Inspektoriati Policor i Kosovës ka njoftuar se ka rekomanduar suspendimin e dy zyrtarëve policorë të cilët thuhet se kanë dështuar në zbatimin e urdhëresës për arrestimin e 17-vjeçarit, Rejhan Bela i dyshuar për vrasjen e rreshterit Muhamed Lika.
Sipas IPK-së ekziston dyshimi se një toger policor në pozitën e shefit të sektorit të operativës ka pasur dijeni për urdhëresën për arrest por dyshohet se nuk ka ndërmarrë veprime konkrete operative për lokalizimin dhe kapjen e personit të kërkuar.
Gjithashtu, bazuar në veprimet hetimore thuhet se dyshohet që një rreshter policor i angazhuar në cilësinë e mbikëqyrësit në njësinë ndërlidhëse për gjykata ka dështuar të raportojë me kohë dhe saktësi për urdhëresën për arrest si dhe dyshohet se nuk ka ndërmarrë hapat e nevojshëm për ekzekutimin e saj.
Në njoftim thuhet se IPK-ja ka vlerësuar se dështimi i tyre në zbatimin e një vendimi të formës së prerë nga gjykata cenon besueshmërinë institucionale dhe përbën bazë për procedim disiplinor dhe hetim të mëtejmë administrativ dhe penal.
Që të dy zyrtarët policorë sipas njoftimit kanë qenë të angazhuar me detyrë në stacionin policor të Kaçanikut./teve1.info/
