Lajme të mira vijnë nga shërbimi emergjent i QKUK-së atje ku po trajtohet futbollisti i Gjilanit, Oltion Bilalli.
Menaxheri i skuadrës gjilanase Drilon Sylejmani ka bërë të ditur se Bilalli është më mirë, derisa ka shkruar për futbollistin në Facebook.
“Asllan azgan Olti zemër luan 🦁. Elhamdulilah ky djali osht mirë edhe e presim ma të fortë 💪”, ka shkruar Sylejmani në Facebook.
Bilalli u godit pa dashje me bërryl gjatë një dueli me portierin e Malishevës në minutat e fundit të ndeshjes Gjilani – Malisheva, që i takoi xhiros së 33-të të Superligës së Kosovës në futboll dhe u zhvillua të martën.
Pasi iu dha ndihma e parë në fushë për shumë minuta, Bilalli u largua me autoambulancë nga fusha me bari sintetik në Gjilan. U nis drejt Spitalit të Gjilanit dhe më vonë për trajtim të mëtejshëm në Qendrën Klinike Universitare e Kosovës (QKUK) në Prishtinë.
