Që nga dita e martë është shtirë në Repartin e Kujdesit Intenziv në Klinikën e Pediatrisë.
E të mërkurën, 5-vjeçari i cili dyshohet se u keqtrajtua nga prindërit iu nënshtrua edhe një operimit.
Detaje për këtë dhanë nga Shërbimi Spitalor i Kosovës.
“Klinika e Pediatrisë ju njoftojnë se pacienti 5 vjeç, i hospitalizuar aktualisht në Kujdesin Intensiv Pediatrik, sot i është nënshtruar intervenimit të nevojshëm kirurgjik në nivel të shputave nga ekipet specialistike të Ortopedisë dhe Kirurgjisë Plastike. Intervenimi sapo ka përfunduar dhe është realizuar sipas indikacioneve mjekësore. Gjatë procedurës kirurgjikale, gjendja e pacientit ka qenë stabile. Pas përfundimit të intervenimit, pacienti është transferuar në Kujdesin Intensiv Pediatrik, ku po vazhdon trajtimin, mbikëqyrjen dhe përkujdesjen e mëtejme postoperatore”, thuhet nga ShSKUK.
Për këtë rast, të mërkurën Ministria për Punë, Familje dhe Vlerat e Luftës Çlirimtare dolën para gazetarëve.
Këtu u bë e ditur se kanë nisur inspektimet rreth këtij rasti.
“Kemi kërkuar një raport kronologjikë të hollësishëm lidhur me trajtimin, menaxhimin e fëmijëve nga Qendra për Punë Sociale. Kemi autorizuar njësinë inspektuese e cila është në kuadër të Ministrisë në të cilën ne bëjmë pjesë”, tha Blerim Shabani, drejtor për Politika dhe Shërbime Sociale dhe Familjare.
Nga kjo ministri thonë se çështja e menaxhimit dhe trajtimit të rasteve të tilla është kompetencë e komunave të cilat i menaxhojnë Qendrat për Punë Sociale.
Drejtori për politika të shërbimeve sociale dhe familjare dha detaje për gjendjen e fëmijëve të tjerë të familjes në Janjeve të Lipjanit.
“…fëmijët janë nën mbikëqyrjen e institucioneve përgjegjëse dhe është duke vepruar që të gjitha nevojat shërbimet të kryhen me nevojat e individuale të fëmijëve”, tha Shabani.
Për rastin e 5 vjeçarit ka reaguar të mërkurën edhe Koalicioni i OJQ-ve për Mbrojtjen e Fëmijëve – KOMF.
Nga KOMF, thonë se ky rast, edhe një herë, shfaq dështimin e institucioneve në mbrojtjen e fëmijëve.
