Brenda pak orëve, të martën kryeqyteti u trondit nga dy raste të gjuajtjeve me armë zjarri.
Aty pati të vrarë e të lënduar.
Këto raste vlerësohet edhe nga Komuna e Prishtinës, se kanë cënuar sigurinë publike të kryeqytetit.
“E cenojnë deri në një farë mase sigurinë publike, por nuk duhet të bëjmë panik që të themi se kryeqyteti është i pasigurt. Policia është duke kryer punën e vet, e ne si drejtori për siguri dhe emergjenca, jemi në përkrahje të policisë që në çdo mënyrë t’iu dalim në ndihmë. Por të kemi parasysh që duhet të rritet edhe bashkëpunimi, që edhe qytetarët ta marrin rolin e tyre duke kontribuar në sigurinë publike në kryeqytet”, thotë Lulzim Fushtica, drejtor për Siguri dhe Emergjenca në Prishtinë.
Veprat kriminale në hapësirat publike, konsiderohet se ndikojnë në shqetësimin e qytetarëve se sa të sigurt janë.
“Çdo vrasje dhe çdo vepër penale, ndikon në çrregullimin e balancës mes sigurisë dhe pasigurisë. Që i bie se çdo vrasje dhe çdo akt i dhunshëm shqetëson qytetarët në aspektin e perceptimit të sigurisë. Kosova ka mjaftueshëm institucione dhe mjaftueshm infrastrukturë ligjore për të luftuar dhe parandaluar kriminaliteti edhe vrasjen konkretisht, si kategori e veprës penale”, thotë Fatmir Çollaku, njohës i sigurisë.
Një faktor i rritjes së sigurisë publike në Prishtinë, llogaritet Policia e Kryeqytetit, e cila është drejt finalizimit si drejtori e veçantë.
“I kemi dakorduar edhe hapat e fundit për krijimin e Policisë së kryeqytetit. Menaxhmenti i kryeqytetit do t’i dalë në ndihmë policisë duke i ofruar edhe objektin dhe çdo gjë që është në kompetencë të kryeqytetit|, shprehet drejtori Fushtica.
Krjimi i Policisë së kryeqytetit ishte ngritur si nevojë kohë më parë.
