Kryetari i Partisë për Liri, Drejtësi dhe Mbijetesë (PLDM), Nenad Rashiq, u ka bërë thirrje qytetarëve serbë që posedojnë dokumente të Republikës së Kosovës, por nuk jetojnë në vend, që të mos pranojnë të shesin votën në këmbim të parave.
Rashiq theksoi se praktika e blerjes së votave dëmton rëndë procesin demokratik dhe të ardhmen e qytetarëve që jetojnë në Kosovë.
“U bëj thirrje të gjithë atyre që nuk jetojnë më në Kosovë, por kanë dokumentet e Kosovës: mos e shisni votën për 50 euro. Ato 50 euro do të thonë katër vjet të vështira për ne që jetojmë këtu”, deklaroi ai.
Rashiq theksoi se oferta të tilla, sipas tij, po vijnë nga Lista Serbe, duke shtuar se një veprim i tillë përbën “shitje të vullnetit qytetar”.
“Nëse vini për të votuar Listën Serbe për 50 euro, më mirë mos ejani fare. Por në çdo rrethanë tjetër, jeni të mirëseardhur si miqtë dhe familjarët tanë”, tha ai, duke shtuar se e mirëpret çdo qytetar që dëshiron të rikthehet dhe të jetojë në Kosovë.
