Ambasadori i ShBA-së, Jeff Hovenier, ka folur sot për deklarimin e ministrit të Qeverisë së Kosovës, Nenad Rashiq, thënë në emisionin “Këndi i Debatit” në Tëvë 1, se një konferencë ndërkombëtare për dialogun Kosovë-Serbi duket në horizont.
Sipas Rashiq, kjo mund të ndodhë pasi që ndërkombëtarët janë të lodhur me të dy palët dhe me mungesën e progresit në implementim të marrëveshjeve.
E në një bashkëbisedim me gazetarë, Hovenier është shprehur i befasuar nga një sugjerim i tillë, duke thënë se rreth një viti më parë Kosova dhe Serbia kanë arritur një marrëveshje të mirë në Ohër, marrëveshje të cilën SHBA dhe BE e konsiderojnë si ligjërisht të obligueshme.
Ambasadori ka thënë se SHBA nuk sheh nevojë për konferencë ndërkombëtare, por vetëm për vullnet më të fortë politik nga të dy palët për të përmbushur obligimet dhe për të zbatuar marrëveshjet.
“Unë jam i befasuar nga ky sugjerim. Ne kemi një marrëveshje të mirë të arritur rreth 1 vit më parë. Konferenca ndërkombëtarë zakonisht kanë rol për të negociuar tekstet. Epo, ka një marrëveshje shumë të mirë që është arritur ndërmjet Kosovës dhe Serbisë në kohën kur u arrit, Shtetet e Bashkuara dhe Bashkimi Evropian thanë, ne e konsideruam atë ligjërisht të detyrueshme për të dyja palët. Ne bëjmë. Dhe ne e kemi thënë vazhdimisht që nga ajo që presim është zbatimi i plotë dhe i plotë nga të dyja palët i të gjitha detyrimeve të tyre sipas marrëveshjes. Aneksi i zbatimit u miratua një muaj më vonë në Ohër që mbetet qëndrimi ynë, ne nuk e shohim nevojën për një konferencë ndërkombëtare, ne shohim nevojën për një vullnet politik më të fortë, nga të dyja palët për të përmbushur realisht detyrimet që kanë hyrë”, ka thënë Hovenier.
Hovenier ka thënë se duke qenë se është ambasador në Kosovë, mund të flasë për detyrimet që ka Kosova, duke përmendur këtu kërkesën amerikane që Kosova të themelojë Asociacionin e Komunave me Shumicë Serbe.
Ambasadori ka thënë se nëse do të kishte në Kosovë një Asociacion funksional, çështja e dinarit do të ishte tejkaluar kohë më parë. Ai ka thënë se SHBA është e zhgënjyer që s’ka vullnet politik dhe veprime për zbatim marrëveshjesh.
“Nuk ka nevojë për konferenca. Ka nevojë për vullnet politik dhe veprim që të dyja qeveritë të zbatojnë plotësisht të gjitha detyrimet e tyre. Dhe ne jemi të zhgënjyer që nuk duket se është kështu”, ka deklaruar ambasadori.
