Ministri për Komunitete dhe Kthim në Qeverinë e Kosovës, Nenad Rashiq, ka thënë se dy sulmues janë vrarë në afërsi të fshatit Banjskë të Zveçanit, ndërsa një është plagosur.
Ai për mediumin serb “Nova.rs” po ashtu ka thënë se është arrestuar edhe një sulmues tjetër.
Sipas tij, nuk ka informata nëse do të ndodhë dorëzimi i pjesëtarëve të grupit kriminel.
“Situata është dramatike. Jam dëgjuar më herët me ministrin Xhelal Sveçla. Së fundi ka dalë lajmi se në atë përleshje kanë mbetur të vrarë disa persona. Mëngjesin e sotëm policia u ka dërguar kërkesë për dorëzim, por nuk ka asnjë komunikim apo kontakt mes dy palëve. Policia thërret me megafon sulmuesit, por nga ana tjetër nuk ka përgjigje. Situata rreth manastirit në fshatin Banjskë është ende dramatike, nuk ka shenja se do të qetësohet së shpejti”, ka thënë ai.
Ndryshe, rreshteri policor Afrim Bunjaku u vra sot në një sulm në afërsi të fshatit Banjskë.
Teksa kryeministri Kurti, sot tha se vrasja e zyrtarit policor në veri, duhet të kthehet në angazhim më të shtuar në luftimin e bandave, strukturave ilegale, krimit e terrorizmit, që e cenojnë sigurinë e qytetarëve dhe rendin kushtetues./teve1.info/.
