Sulmuesi i krahut, Milot Rashica do të kthehet në formacionin startues te skuadra e Beshiktashit për ndeshjen e shtyrë të xhiros së tretë të kampionatit të Turqisë.
Beshiktashi, sot prej orës 19:00 përballet në udhëtim me Konyasporin, ndeshje në të cilën Rashica do të aktivizohet prej minutës së parë, kanë raportuar mediumet turke.
Rashica nuk ka qenë startues në dy ndeshjet e fundit kampionale, me Galatasarayn e Genclerbirligin, duke u aktivizuar në total për 26 minuta.
Beshiktashi për ndeshjen me Konyasporin ka shtatë mungesa, ndërsa trajneri Sergen Yalcin ka vendosur ta aktivizojë Rashicën në krahun e djathtë të sulmit.
Deri më tani, futbollisti i Kosovës ka 5 paraqitje në kampionat kurse Beshiktashi renditet i shtati në tabelë me 13 pikë të mbledhura.
