Futbollisti i Kombëtares së Kosovës, Milot Rashica, është rikthyer zyrtarisht në stërvitje me skuadrën turke Besiktas, duke lënë pas një periudhë të vështirë me lëndime dhe pasiguri rreth të ardhmes së tij profesionale.
Pas mungesës së tij në dy ndeshjet e muajit shtator me përfaqësuesen e Kosovës, për shkak të një problemi fizik, Rashica ka punuar intensivisht për rikuperimin e plotë dhe për të rikthyer formën e tij më të mirë.
Përveç aspektit fizik, sulmuesi anësor ishte gjithashtu në një fazë vendimtare të karrierës, pasi po shqyrtonte mundësinë e transferimit në një skuadër të re gjatë afatit kalimtar veror.
Pavarësisht spekulimeve dhe interesimit të disa klubeve, përfshirë ekipe nga Bundesliga e Gjermanisë, Rashica në fund ka vendosur t’i qëndrojë besnik klubit të tij aktual dhe të vazhdojë aventurën në Superligën turke me Besiktasin.
Rashica, i cili në të kaluarën ka luajtur për klube si Vitesse, Werder Bremen, Galatasaray dhe Norwich City, ka edhe 61 paraqitje me Kosovën, si dhe ka shënuar 12 gola.
