Shtëpia e Naser Pajazitajt, i cili ishte i dyshuar për vrasjen e kushërirës së tij, Donjeta Pajazitaj, është sulmuar me armë zjarri.
Këtë e ka bërë të ditur avokati i Naser Pajazitajt, Ahmet Tahiri.
Ai përmes një postimi në Facebook ka bërë të ditur se sulmi ka ndodhur të hënën pas mesnatës.
“Mbrëmë familja dhe shtëpia e Naser Pajazitajt është sulmuar me armë zjarri rreth orës 02:00 të mëngjesit duke traumatizuar Naserin dhe familjen e tij.Lusim organet e drejtësisë, përkatësisht Policinë dhe Prokurorinë Themelore në Pejë që sa më parë të zbulohet ky rast dhe personat që kanë kryer këtë vepër të marrin dënimin e merituar”, ka shkruar ai.
Kujtojmë se Naser Pajazitaj, në maj të vitit të kaluar, në rigjykim Gjykata Themelore e Ferizajt e kishte dënuar me burgim të përjetshëm Naser Pajazitajn për vrasjen e Donjetës në Bjeshkët e Strellcit, në Deçan ndërsa në seancën e mbajtur me datë 06 prill 2023, Gjykata Supreme e ka liruar nga kjo akuzë./teve1.info/
