Dy vajza janë raportuar të zhdukura, gjatë 24-orëve të fundit në Kosovë.
Policia thotë se rasti i parë është raportuar në Prizren, ku një grua ka raportuar se vajza e saj është larguar nga shtëpia që dy ditë dhe më nuk është kthyer.
Ky rast, në raportin ditor thuhet se është duke u hetuar.
“Rr. Ekrem Rexha, Prizren, 17.11.2023 – 17:00. Ankuesja femër kosovare ka raportuar se vajza e saj viktima femër kosovare është larguar nga shtëpia dhe nuk është kthyer më. Rasti është duke u hetuar”, thuhet në njoftim.
Ndërkohë, rasti i dytë është raportuar në Gjilan, ku një vajzë e mitur nga fshati Livoq i Ulët, thuhet se ka dalë nga shtëpia dhe më nuk është kthyer.
Rastin në Polici e ka raportuar nënë e të miturës, ku është ankuar se vajza e saj nuk iu është lajmëruar familjarëve të saj.
“Fsh. Livoq i Ultë-Gjilan, 18.11.2023-22:15. Ankuesja kosovare ka raportuar se më datën e lartcekur nga shtëpia ka dalë vajza e saj e mitur dhe deri në kohën e raportimit te rastin, vajza e saj nuk është kthyer dhe nuk iu është lajmëruar familjarëve të saj. Rasti është duke u hetuar”, thotë Policia e Kosovës./teve1.info/
