Pak ditë para zgjedhjeve të përgjithshme në Slloveni, mediat atje kanë raportuar për një skandal që ndërlidhet me shpëlarje parash, ku thuhet se janë të përfshirë personalitete të nivelit të lartë.
Në mesin e të përfshirëve, është përmendur edhe emri i ambasadorit të Kosovës në Kroaci, Martin Berishaj.
Sipas medieve sllovene, Berishaj ka luajtur rolin e transferuesit të 600 mijë eurove, nga kompania e tij në Mal të Zi tek politikani slloven, Robert Golob.
Por, këto i ka cilësuar si shpifje, ambasadori kosovar, derisa ka njoftuar se ka marrë hapa ligjor.
“Pavarësisht nga fushata parazgjedhore në Slloveni dhe ballafaqimi i fundit në mes akterëve kryesorë politik, i z. Jansha dhe z. Golob, ku u mohua shkrimi i Planet TV lidhur me emrin tim, nga sot, padia ime kundër portalit në fjalë, hap rrugë për fjalën e fundit të Gjykatës. Nuk është e drejtë të jemi thjesht të sigurt në drejtësi dhe në të vërtetën. Duhet edhe ta mbrojmë drejtësinë dhe të vërtetën. Përndryshe shpifjet bëhen normale”, tha Berishaj.
Për këtë rast, ka folur edhe presidentja Vjosa Osmani. Osmani tha se i vjen keq që mediat nuk bëjnë pyetje, por konstatojnë diçka që nuk e ka vërtetuar gjykata.
E ndryshe nga Osmani, po e sheh partia më e madhe opozitare.
Shefi i grupit parlamentar të PDK-së, Abelard Tahiri, ka kërkuar shkarkimin e ambasadorit.
Pozitën e ambasadorit në Kroaci, Martin Berishaj e mori më 20 dhjetor të vitit të kaluar.
Raporti i gazetares Florijeta Dernjani.
