Ylli brazilian i Barcelonës, Raphinha, ka treguar se vendimi i tij për të qëndruar në klub këtë sezon është ndikuar fuqishëm nga trajneri Hansi Flick. Në një deklaratë të fundit, ai ka rrëfyer bisedën vendimtare që pati me gjermanin para fillimit të sezonit.
“Hansi Flick më ndryshoi jetën. Ai më telefonoi dhe më kërkoi të vija në stërvitje para se të merrte një vendim, sepse donte të fliste me mua dhe më bëri të ndihem i rëndësishëm në planet e tij”, u shpreh Raphinha. Anësori brazilian, i cili është përfolur për një largim të mundshëm gjatë merkatos së verës, pranoi se kjo qasje e Flick ishte një pikë kyçe në vendimin e tij për të qëndruar në “Camp Nou”.
“Fola me gruan time dhe i thashë: Nëse ky njeri është i drejtë dhe sheh përpjekjen që bëj në stërvitje, unë do ta bëj të më dëshirojë brenda një jave dhe nuk do të pendohet. Dhe mendoj se kisha të drejtë”, ka përfunduar Raphinha.
Barcelona është në një periudhë të rëndësishme të sezonit dhe Flick ka bërë disa ndryshime në skuadër, duke i dhënë besim lojtarëve si Raphinha.
