Eksperti i Sigurisë, Burim Ramadani duke komentuar rezultatet e bisedimeve politike mes Kosovës dhe Serbisë tha se fakti që është arritur në një situatë ku tema kryesore është siguria, sipas tij, nënkupton se ka mangësi apo shmangie të rezultateve politike në bisedimet mes të dyja vendeve.
Ramadani në emisionin “ReSpublika” në Tëvë1, tha se shteti i Kosovës do të duhet të bëjë çmos që në aspektin politik të ndërtojë pozicione më të mira në raport me partnerët veç e veç, duke përfshirë këtu edhe raportet me Serbinë.
“Fakti që kemi arritur në një situatë ku tema kryesore është siguria, shqetëisimi kryesor kërcënimi kryesor është kërcënim i sigurisë, është e qartë se ka mangësi, lëshime apo shmangie të rezultateve politike të bisedimeve. Unë besoj që Kosova do të duhej të bëjë çmos që në aspektin politik të ndërtojë pozicion më të mirë në raport me partnerë veç e veç, në raport me NATO-n dhe pastaj edhe ndaj Serbisë, ose në raport ndaj qëllimeve të Serbisë”, tha ai.
Sipas Ramadanit, vendosja e temave vetëm në dimenzione të sigurisë nuk është që i konevenon Kosovës.
“Vendosja e temave vetëm në dimenzione të sigurisë nuk është që absolutisht i konvenon Kosovës. Jo vetëm për shkak të pasojave politike ekonomike të cilat mund të vijnë dhe janë të dukshme që ekzistojnë edhe tash, por se edhe për shkak të nevojës së zhvillimit normal të kapaciteteve të sigurisë. Zhvillimit normal të ndërveprimit të institucioneve të sigurisë edhe me NATO-n dhe me shtetet veç e veç dhe jo vetëm në zona, apo në aspekte operacionale konfliktuoze apo të ngjashme”, shtoi ai./teve1.info./
