Ish-kryeinspektori i AKI-së, Burim Ramadani vlerëson se sjellja konstruktive e Kosovës nënkupton që vendi do të marrë mbështetje nga aleatët ndërkombëtarë, për anëtarësim në organizata ndërkombëtare.
“Në kuptimin e karrotave që mund të merr Kosova, sigurisht që sjellja konstruktive e Kosovës dhe e argumentuar ligjërisht dhe politikisht, sigurisht që e merr mbështetjen e pastajme. Nuk e di nëse kjo është plotësisht e saktë për liberalizimin e vizave megjithëse ka mbetur njëfarë procesi politik, sepse kriteri është në një kohë jashtëzakonisht të gjatë. Edhe aplikimi për Këshillin e Evropës edhe mekanizmat tjerë, shtëpia nuk mbahet pa miq, nuk mund të anëtarësohet Kosova në organizata ndërkombëtare apo rajonale pa mbështetjen e miqve”, ka thënë Ramadani.
I pyetur se a mundet në këtë kohë Kosova të aplikoj për anëtarësim në INTERPOL, Ramadani thotë se duhet paraprakisht të ketë mbështetje e lobim.
Megjithatë sipas tij Kosova duhet të synojë me këmbëngulësi që të marrë planin e veprimit për anëtarësim në NATO.
“Në kuptimin procedural Kosova mund të synojë sërish që të aplikojë në INTERPOL, por duhet mbështetje, duhet vota sepse ka proces votimi njëjtë sikur për organizata tjera. Paraprakisht duhet një proces lobimi, sjellje konstruktive në kuptim të partneritetit me aleatët që i kemi por unë besoj që Kosova përpos Këshillit të Evropës duhet të synojë jashtëzakonisht qartë dhe me këmbëngulësi që të merr planin e veprimit për anëtarësim në NATO, të hap dialogun politik mes NATO-s dhe Kosovës sepse pavarësisht se FSK-ja është e ndërtuar dhe e konsoliduar mbi parimet dhe standardet e NATO-s, anëtarësimi do të kërkoj edhe disa reforma, qofshin politike qofshin legjislative“, ka deklaruar Ramadani në Info Nata në Tëvë 1.
