Kryeministri i Shqipërisë, Edi Rama ka komentuar zhvillimet e fundit politike që kanë përfshirë Tiranën lidhur me dekretin e Presidentit Bajram Begaj për zhvillimin e zgjedhjeve të parakohshme në Tiranë, në një kohë kur Erion Veliaj ka dërguar në Gjykatën Kushtetuese vendimin për shkarkimin e tij.
Rama ka mbrojtur vendimin e Presidentit për të dekretuar zgjedhjet e parakohshme në Tiranë, ndërsa ka kritikuar ata që e kanë vënë në diskutim legjitimitetin e këtij akti.
“Tirana nuk mund të presë. Ata që diskutojnë legjitimitetin e dekretit nuk kanë faj, sepse nuk kanë as shkollën, as pavarësinë intelektuale të Ilir Rusmalit, këshilltar juridik i Presidentit dhe ish-ministër i Drejtësisë i PD-së, që për integritet dha dorëheqjen dhe refuzoi të bëhej pjesë e korrupsionit që degjeneroi në një tragjedi. Tirana nuk mund të presë më, kush thotë të kundërta nuk e ka idenë se çfarë duhet që kjo lokomotivë të ecë me ritmin e duhur” ka deklaruar Rama në podcastin e tij “Flasim”.
Kryeministri e ka cilësuar shkarkimin e Veliajt si një zhvillim “brutal të drejtësisë” dhe ka theksuar se Tirana ka mbetur pa kryetar bashkie në një moment kritik për qytetin dhe se kjo nuk mund të zgjasë më shumë.
“Tirana mbeti pa kryebashkiak si pasojë e një zhvillimi brutal të lidhur me drejtësinë. Kryetari i bashkisë u mor nga zyra pa gjyq dhe u çua në paraburgim, ku vazhdon të mbahet ende prej gati 8 muajsh, përmes një procesi me standarde që, për ta thënë butë, janë të dyshimta. Por ama, ndërkohë, Tirana nuk mund të presë dhe kush thotë të kundërtën thjesht nuk e ka idenë se çfarë duhet që kjo lokomotivë e Shqipërisë të ecë me ritmin e duhur”, është shprehur kryeministri Rama.
Gjatë podcastit, Rama ka shprehur mbështetjen e plotë për kandidaturën e kandidates së Partisë Socialiste për Bashkinë e Tiranës, Ogerta Manastirliut, duke u shprehur i bindur se ajo do të jetë “kryetarja e re e bashkisë së Tiranës”./rtsh.al
