Kryeministri i Shqipërisë, Edi Rama, ka përjashtuar mundësinë që të hënën në Tiranë , në kuadër të Procesit të Berlinit të ketë një takim ndërmjet kryeministrit të Kosovës, Albin Kurti dhe kryeministres së Serbisë, Ana Bërnabiq.
Ai ka thënë se Procesi i Berlinit nuk është vendi ku zgjidhen çështjet bilaterale, por tha se në drekën e punës është paraparë të flitet edhe për raportet fqinjësore
“Ky proces dhe samitet e këtij procesi nuk janë vendi për zgjidhjen e çështjeve bilaterale, por në programin e samitit që është përgatitur prej shumë kohësh në harmoni me kancelarinë gjermane, dreka e punës së liderëve do t’i kushtohet edhe marrëdhënieve fqinjësore në rajon. Pra hapësira për një diskutim të hapur në mes të pranishmëve është e programuar”, ka thënë Rama.
Takimi në Tiranë në kuadër të Samitit të Procesit të Berlinit, do të jetë i pari, ku kryeministri Kurti merr pjesë bashkë me një përfaqësues të lartë të Serbisë, pas sulmit terrorist serb më 24 shtator në veri të Kosovës, ku një polic mbeti i vrarë.
