Rama i tha mediave se i vjen shumë mirë që kanë arritur t’i japin jetë një procesi ku të gjithë kanë patur mundësinë të kontribuojnë, derisa për presidentin e ri tha se është një figurë e identifikueshme me qytetarin shqiptar, dinjitoz dhe i respektueshëm, si dhe besnik ndaj vendit dhe detyrës.
“Besoj se kemi arritur qartësisht objektivin që kemi pasur qysh në krye të herës dhe të gjitha reagimet flasin për këtë. Natyrisht përjashtuar ndonjë reagim pa lidhje të hapësirës politike, flas përtej kësaj, që do të thotë që i kemi dhënë Shqipërisë një President normal, një figurë të pakontestueshme në aspektin e integritetit të humanizmit dhe patjetër edhe të përkushtimit për vendin dhe për njerëzit”, tha ai.
Kryeministri Rama është pyetur edhe për një lloj një ndihme nga Ilir Meta, i cili dekretoi largimin nga detyra të Bajram Begajt.
“Këto janë muhabete që s’kanë lidhje fare me çfarë ka ndodhur sot. Ajo që ka ndodhur sot dhe që ka rëndësi për të sotmen dhe të nesërmen është që Shqipëria pas një periudhe dramatike në zyrën e kreut të shtetit do të ketë një president normal, për një vend normal dhe për funksionimin normal të institucionit të kreut të shtetit”, tha Rama.
E derisa foli për mosmbështetjen e opozitës, Rama tha se nuk kanë kërkuar konsensus me të vdekurit.
“Se kemi kërkuar kurrë dhe as e kemi pritur asesi që të kemi konsensus me të vdekurit. Ne kemi qenë këtu për të patur konsensus me të gjallët dhe besoj se konsensusi me të gjallët dhe me të gjallë këtu kuptoj njerëzit që besojnë te ky vend, njerëzit që punojnë në këtë vend, njerëzit që duan të rrisin fëmijët në këtë vend, njerëzit që e duan këtë vend më të mirë, e kemi arritur plotësisht me këtë figurë”, tha ai./kp/
