Kryeministri Edi Rama në një panel të ndikimit të mbajtur në Chatham House detajoi qëndrimin e tij të mëparshëm.
Ai aty tha se Shqipëria është e gatshme të pranojë anëtarësimin në Bashkimin Evropian me një “status të ndryshuar”, që do të thotë pa të drejtën e vetos apo votës, derisa BE të përfundojë reformën e vetë mekanizmave të saj vendimmarrës.
Rama theksoi se brenda BE-së ekziston një “dëshpërim shumë i qartë” sidomos mes anëtarëve të mëdhenj, për shkak të kërkesës që çdo vendim të arrihet me konsensus (veto) në tryezën me 27 anëtarë.
Ai parashikoi se shtimi i anëtarëve pa zgjidhur këtë çështje vetëm do të shtonte numrin e atyre që mund të përdorin veton për të bllokuar procese.
Nga Londra, kryeministri Edi Rama foli gjerësisht për sfidat e procesit të integrimit, marrëdhëniet me Bashkimin Evropian dhe rolin e rajonit në kontekstin e ri gjeopolitik pas luftës në Ukrainë.
Gjatë fjalës së tij në panelin e “Chatham House” me temën “Ballkani Perëndimor dhe Bashkimi Evropian”, Rama theksoi se ndodhemi në një periudhë kur Evropa po sillet më mirë me Ballkanin, por njëkohësisht nënvizoi se procesi i anëtarësimit mbetet i ndërlikuar, pasi është një kombinim i aspektit teknik dhe politik.
“Ne kemi shumë sfida, por, siç ju thashë, jemi në një periudhë kohe kur Evropa po sillet shumë mirë me ne. Është e vështirë të bësh biseda pikante dhe rreziku për të qenë i mërzitshëm është shumë i madh. Ajo që mund të them është se, në përgjithësi, besoj se në këtë pikë në kohë ne po ecim më mirë se Evropa”, tha Rama./RTSH
