Kryetari i Komunës së Prishtinës, Përparim Rama ka thënë se rruga “Jim Xhema” apo siç njihet rruga “A” është ndër projektet më të rëndësishme për kryeqytetin.
Rama ka shpërndarë një video ku shihet traseja e kësaj rruge, derisa ka theksuar se në këtë video qytetarët mund ta kuptojnë rëndësinë e këtij projekti.
“Në videon më poshtë mund të shihni trasenë e rrugës dhe të kuptoni rëndësinë e veçantinë e kësaj rruge 6 kilometra, e cila do të lidhë lagjet “Kalabria” dhe “Mati” me Prishtinën e Re, duke reduktuar kështu në masë të madhe kolonat, eliminuar në tërësi kundërmimin e ujërave të zeza në lagjen “Kalabria” dhe rritur zhvillimin ekonomik në Kryeqytet”, ka shkruar ai.
Tutje i pari i kryeqytetit ka theksuar se kjo rrugë mund edhe të vonohet por që siç tha ai, kjo rrugë do të bëhet për të mirën e qytetarëve, jo vetëm të Prishtinës por të gjithë vendit.
Ndryshe, ditë më parë Gjykata Komerciale, me Aktvendim ka pezulluar punimet në rrugën A në Prishtinë, pasi kompania “Sallahu” dyshohet të ketë falsifikuar dhe mashtruar në prokurim.
Rrjedhimisht, kompania nuk mund të marrë pjesë dhe as të ekzekutojë kontrata publike.
Kështu, me këtë aktvendim pezullohen punimet e punëkryesit në rrugën A në Prishtinë./teve1.info
