“Kemi arritur në konkluzionin që z. Bajram Begaj është i duhuri për të qenë Presidenti i Republikës së Shqipërisë për 5 vitet e ardhshme”, tha kryeministri Rama.
Kreu i PS u shpreh i sigurt që do t’i sigurojnë votat e nevojshme për ta zgjedhur Begajn Presidentin e ri të vendit.
Duke folur pas mbledhjes së Kryesisë së PS, Rama tha se është ndjekur shembulli i Alfred Moisiut në krye të Presidencës për të arritur tek ky propozim.
Rama tha se do të zhvillojë mbrëmjen e së premtes një takim me kandidatin për President ndërsa shtoi se ishin “26 kandidatura që janë shoshitur” për të arritur tek emri i Begajt.
“Në listën e fundit ishin 6 emra, 3 gra dhe 3 burra”, tha Rama duke iu përgjigjur pyetjes së Euronews Albania se përse nuk pati një kandidate për President.
Begaj, i lindur në 1967, është Shef i Shtabit të Përgjithshëm të Forcave të Armatosura Shqiptare.
Në vitin 2020, Bajram Begaj mori rolin e Shefit të Shtabit të Përgjithshëm të Forcave të Armatosura Shqiptare. /euronews.al