Kryetari aktual i Prishtinës dhe kandidati i Lidhjes Demokratike të Kosovës (LDK) për edhe një mandat në kryeqytet, Përparim Rama, është takuar të mërkurën me mësimdhënësit e Prishtinës.
Në një postim në Facebook, Rama ka theksuar se vizioni i tij për arsimin mbetet i pandryshuar ndërtimi i një Prishtine që e respekton mësuesin, e fuqizon shkollën dhe e sheh të ardhmen në sytë e çdo nxënësi.
“Mësimdhënësit janë themeli i një Prishtine që ngrihet mbi dije, barazi dhe mundësi për çdo fëmijë. Çdo hap përpara i arsimit në kryeqytet mban vulën e përkushtimit të tyre, njerëz që rrisin gjenerata me dije, durim dhe dashuri. Vizioni ynë mbetet i njëjtë: një Prishtinë që e respekton mësuesin, e fuqizon shkollën dhe e sheh të ardhmen në sytë e çdo nxënësi. Ky rrugëtim vazhdon bashkë, me angazhim të palëkundur për kushte më të mira në arsim”, ka shkruar Rama në Facebook.
Rama, i cili garon për mandatin e dytë në krye të Prishtinës, do të përballet në balotazhin e 9 nëntorit me kandidatin e Lëvizjes Vetëvendosje, Hajrullah Çeku.
