Kryetari i Prishtinës, Perparim Rama ka deklaruar se kompania “Pastrimi” është drejt falimentimit për shkak të siç ka thënë keqmenaxhimit.
Përmes një video në rrjetin social Facebook, Rama ka thënë se kjo kompani është shndërruar në barrë nga paaftësia dhe papërgjegjësia e menaxhmentit.
Sipas tij fajtorë për këtë situatë nuk janë punëtorët por ata që kanë marrë paga të majme dhe nuk kanë ditur të udhëheqin drejt ndërmarrjen.
“Qytetarë të kryeqytetit kompania “Pastrimi” është drejt falimentimit për shkak të keqmenaxhimit. Kjo ndërmarrje publike që duhet ta mbaj kryeqytetin është shndërruar në barrë për shkak të paaftësisë dhe papërgjegjësisë së menaxhmentit. Sot rrezikohen pagat e punëtorëve, deponia mund të mbyllet dhe qyteti po e ndjen çdo ditë pasojën e këtij kemenaxhimi. Punëtorët nuk kanë faj, faj kanë ata që kanë marrë paga të majme menaxheriale por s’kanë ditur e as nuk kanë dasht me udhëheq drejt ndërmarrjen”, ka thënë ai.
Tutje, Rama ka paralajmëruar se më 6 maj në Kuvendin Komunal do të kërkoj ndihmë emergjente financiare për të ‘mbrojtur punëtorët dhe shërbimin për qytetarët’, për çka ka ftuar të gjithë asambleistët ta mbështesin.
“Unë nuk do ta lejoj që kryeqyteti të mbulohet nga mbeturinat për shkak të këtij keqmenaxhimi, prandaj më 6 maj në Kuvenin Komunal do të kërkoj ndihmë emergjente financiare për të mbrojtur punëtorët dhe shërbimin për qytetarët e jo për të shpëtuar menaxhmentin që e ka dërguar këtë kompani në kolaps. Kjo është betejë për drejtësi sociale dhe për dinjitet publik. Ne s’do të heshtim, nuk do të bëhemi bashkëfajtorë në këtë keqmenaxhim. Ftoj çdo asambleist që i shërben qytetarëve dhe jo interesave të ngushta të mbështes këtë hap të nevojshëm për kryeqytetin”, është shprehur Rama.
