Rama pajtohet me Grenellin për Thaçin: Sa më shumë të vazhdojë padrejtësia, aq më e madhe njolla në Speciale

Kryeministri i Shqipërisë, Edi Rama, ka shpërndarë deklaratën e emisarit amerikan për misione të posaçme, Richard Grenell, i cili teksa e ka uruar përvjetorin e Pavarësisë së Kosovës, ka thënë se “themeluesi i shtetësisë së Kosovës, ish-presidenti Hashim Thaçi, do të duhej të festonte sot në Prishtinë, jo pas grilave në Hagë.

Rama ka deklaruar se pajtohet me atë që ka shkruar Grenell.

“Absolutisht! Dhe sa më shumë të vazhdojë, aq më e madhe është njolla në organin ndërkombëtar të drejtësisë”, ka shkruar ai në X.

Ndryshe, Grenell, ka uruar miqtë në Kosovë për 17 vjetorin e pavarësisë së Kosovës, derisa në këtë mesazh urimi ka përmendur ish-presidentin Hashim Thaçi, që sipas tij po mbahet padrejtësisht në Hagë.

“Ky moment historik është lënë në hije nga një padrejtësi e rëndë. Babai themelues i shtetësisë së Kosovës, presidenti Hashim Thaçi, duhet të festojë sot në Prishtinë – jo pas hekurave në Hagë”, ka shkruar Grenell në rrjetin social X.

Sipas tij institucionet shtetërore të Kosovës kanë dështuar të ndërmarrin veprimet e nevojshme ligjore për t’i dhënë fund kësaj “padrejtësie”.

“Evropianët kanë dështuar të veprojnë kundër kësaj padrejtësie në pesë vitet e fundit. Dhe institucionet shtetërore të Kosovës kanë dështuar të ndërmarrin veprimet e nevojshme ligjore për t’i dhënë fund kësaj padrejtësie – për shkak të politikës. Ky burgim i padrejtë duhet të marrë fund”, tha Grenell në X.