Rama tha se kosovarët edhe kur kanë jetuar në ish-Jugosllavi dhe Serbi kanë qenë të lirë të udhëtojnë.
“Ky është turp për BE-në! Qytetarët e Kosovës janë të vetmit në kontinentin tonë që nuk lejohen të udhëtojnë të lirë. Ata kanë jetuar më parë në ish-Jugosllavi dhe Serbi dhe kanë qenë të lirë të udhëtojnë. Dhe tani? A janë të pavarur dhe të lirë nga diktatura apo çlirimtarët i mbajnë në një lloj burgu”, ka thënë Rama.
Ai në një intervistë për gazetën gjermane ”Frankfurter Rundschau”, ka folur për dialogun Kosovë-Serbi duke shtuar se pajtimi mes dy vendeve do të marrë kohë.
“Ne jemi një komb, i njëjti gjak dhe flasim të njëjtën gjuhë. Por, ne jetojmë në dy shtete. Pajtimi mes qytetarëve të Kosovës dhe Serbisë do të marrë kohë. Kush do ta kishte menduar se gjermanët dhe francezët do të ishin sërish partnerë të ngushtë kaq pak vite pas Luftës së Dytë Botërore? Vizioni dhe lidershipi politik nevojiten për të çuar përpara këtë proces. Por, ky proces do të ndodhë, jam i sigurt. Nuk ka kthim pas”, ka thënë Rama.
Kryeministri i Shqipërisë ka folur edhe për raportet me presidentin e Serbisë, Aleksandër Vuçiq, me ti cilin ka thënë se kanë edhe mospajtime.
“Ne kemi një marrëdhënie të mirë personale edhe pse herë pas here nuk pajtohemi. Për shembull, ai thotë “e ashtuquajtura Kosovë”. Unë them “shteti i pavarur i Kosovës”. Ne tani i zgjidhim mosmarrëveshjet tona në një mënyrë të civilizuar”, ka thënë Rama.
Ai ka folur edhe për integrimin në BE të Shqipërisë dhe Maqedonisë Veriore ku për këtë të fundit tha se mënyra se si Bullgaria e trajtoi ishte e turpshme.
“Sofja na ka ndarë më shumë se sa na ka bashkuar. Shpresoj që kjo të ndryshojë tani”, është shprehur Rama.
