Kryeministri i Shqipërisë, Edi Rama deklaroi sot në Forumin e Paqes në Paris se Kosova për Shqipërinë është një shtet i ligjshëm dhe i drejtë, por për Serbinë dhe disa vende të tjera nuk shihet në të njëjtën mënyrë.
Rama tha se kjo situatë mund të krijojë tensione dhe dëm ekonomik në rajon, duke theksuar se Shqipëria, si treg i vogël, duhet të bashkëpunojë dhe të shmangë konfliktet, në vend që të rrijë “me kokën pas dhe të ndez energji negative”.
“Kosova është një problem sepse për ne është një shtet në të drejtën e vet. Por për Serbinë ose vend të tjera nuk është. Ky është një problem i madh ose do të vazhdonim të rrinim me kokën pas e të ndiznim tensione dhe energji negative, dhe të dëmtonim veten dhe ekonominë tonë, jemi tregje të vogla, ose të jemi bashkë ose alternative tjetër ishte të mos binim dakord dhe të mos bashkëpunonim”, tha Rama,
Rama gjithashtu paralajmëroi se Europa po “ballkanizohet shumë” dhe përmendi Francën dhe Britaninë si shembuj të sfidave të brendshme dhe paaftësisë për të miratuar buxhete.
“Europa është ballkanizuar shumë. Mendoj që edhe Franca është ballkanizuar shumë, nuk po miratojnë dot një buxhet, shihni Britaninë, është edhe më keq. Tani jemi ne të mirët, prandaj u them bëni paqe, mos kërcënoni, komunikoni, sepse vijmë nga ferri dhe ne jemi lajmëtarët. Nëse duan të na dëgjojnë ta bëjnë, nëse jo, ne sërish jemi në rregull”, theksoi Rama.
Ai përfundoi mesazhin e tij me thirrjen për paqe dhe komunikim: “Nëse bota do të bëhet më e mirë, do të themi se ne bëmë punën tonë. Do të na jepet një vend në parajsë si shqiptarë.”
