Kryetari i Prishtinës ka njoftuar se nga nesër transporti publik në kryeqytet do të ndalet për shkak të bllokimit të buxhetit dhe të hyrave vetanake të kryeqytetit nga Ministria e Financave.
Rama ka njoftuar se paralajmërime për ndërprerje të shërbimeve kanë ardhur edhe nga ndërmarrje të tjera publike, të cilat po përballen me vështirësi financiare.
“Sapo kam përfunduar një takim me përfaqësues të transportit urban dhe të shoqatës së transportuesve të sektorit privat, të cilët më njoftuan se, për fat të keq, nga nesër transporti publik në kryeqytet do të ndalet. Paralajmërime të ngjashme kemi marrë edhe nga ndërmarrje të tjera, të cilat prej muajsh nuk kanë marrë pagesat e nevojshme, duke rrezikuar kështu shërbimet esenciale për qytetarët”, ka thënë ai në një konferencë për media.
Ai ka kritikuar situatën, duke e lidhur atë me vendimet e marra gjatë periudhës zgjedhore:
“Nuk kam besuar kurrë që qytetarët e këtij vendi do të viheshin në rrezik nga interesa zgjedhore. Buxheti i kryeqytetit u përdor si mjet në zgjedhjet lokale, por ato kanë përfunduar dhe qytetarët votuan për zhvillim e jo për bllokim”.
Rama i ka bërë thirrje institucioneve shtetërore dhe zyrtarëve përkatës që të veprojnë menjëherë dhe në përputhje me ligjin, për të garantuar funksionimin e shërbimeve bazë në qytet.
“Kryeqyteti duhet të funksionojë dhe të mos bllokohet. Të lëmë anash logjikën partiake dhe të vendosim qytetarin në qendër. Le të punojmë së bashku që fëmijët të shkojnë në shkollë me ushqim dhe siguri, të moshuarit të kenë kujdes dhe mbështetje, qytetarët të kenë transport publik, rrugët të jenë të ndriçuara dhe shërbimet komunale të funksionojnë pa ndërprerje”,është shprehur Rama.
