Kryeministri i Shqipërisë, Edi Rama ka reaguar përsëri pas përleshjes që ndodhi në seancën e sotme në Kuvendin e Kosovës.
Përmes një postimi në Twitter, Rama ka shkruar se e “mbytën” miq nga Kosova “pse e ka mbrojtur Albinin”, përcjell teve1.info
Ai është shprehur se atij nuk i intereson se kush e “ka gjuajtur shishen e parë”.
“Më “mbytën” miq nga Kosova pse e paskam mbrojt Albinin, se shishen e parë e paska gjujt Bislimi dhe paska qenë VV që e paska hap kapitullin e dhunës në Kuvendin e Kosovës kur ishte në opozitë! Nuk më duhet kush e ka gjujt shishen e parë, mbase keni të drejtë ju, mbase jo, por nëse demokracia parlamentare katandiset në kush gjujti i pari atëherë kemi një problem edhe me kuptimin e demokracisë, edhe me kuptimin e këtij momenti kyç për Kosovën, e cila nuk ia ka borxh askujt besoj shfaqjen skandaloze të ditës së sotme”, ka shkruar ai.
Sipas tij, ajo çfarë ka ndodhur sot është e trupshme, teksa uroi që opozita të distancohet nga veprimet.
“Dhe si dikush që e di mirë se sa poshtë ka rënë Kosova në sytë e krejt botës demokratike për shkak të qasjes së gabuar të qeverisë së saj, unë vazhdoj mendoj se çka ndodhi sot është e turpshme dhe jam i bindur se justifikimi i asaj shëmtie nuk e ndihmon, po e dëmton ende më shumë reputacionin e Kosovës, prandaj thashë dhe e them prapë se uroj që opozita të distancohet nga një shëmti e tillë!”, ka shkruar Rama në Twitter.
Në seancën e Kuvendit të Kosovës të enjten ka ndodhur një përleshje mes deputetëve të pozitës dhe opozitës.
Gjatë fjalimit të Kurtit, zëvendëskryeministri Bislimi largoi një fotografi ku shihet kryeministri me hund të madhe, ndërsa nga pamjet e kamerave shihet se deputeti i PDK-së, Mërgim Lushtaku shkonte drejt foltores së Kuvendit, ku ishte duke folur kryeministri Kurti e të cilit i hodhi ujë e më pas edhe Bislimit.
Pas kësaj ka reaguar ministri Murati për të ndalë, e Bislimi e gjuan me një shishe Lushtakun.
Në përleshje përfshihen edhe deputetë tjerë të PDK-së, ku nga pamjet shihet se Hajdar Beqa e godet ministrin Murati dhe shtynë ministren Haxhiu.
Kryetari i Kuvendit, Glauk Konjufca ka kërkuar që të ndërhyjë Policia e Kosovës. /Teve1.info/
