Kryetari i Prishtinës, Përparim Rama, ka vlerësuar se konstituimi i Kuvendit dhe formimi i Qeverisë përbëjnë hapa të rëndësishëm për funksionimin demokratik të vendit.
Përmes një reagimi në Facebook, Rama ka uruar që institucionet e reja të krijohen me përgjegjësi dhe në frymë bashkëpunimi, duke pasur në qendër interesin publik dhe mirëqenien e qytetarëve.
“Shoqëria jonë ka nevojë për zhvillim të qëndrueshëm, për institucione funksionale dhe për një kulturë bashkëpunimi që i përgjigjet standardeve të një demokracie moderne”, ka shkruar Rama.
Ai ka theksuar se Kryeqyteti pret nga qeveria e re më shumë se retorikë, duke kërkuar punë konkrete, përgjegjësi institucionale dhe bashkëpunim të ndërsjellë, sidomos pas përvojave jo të kënaqshme nga mandati i kaluar.
“Koha kërkon seriozitet, vizion dhe angazhim real në shërbim të së mirës së përbashkët”, ka përfunduar Rama.
