“Një dhuratë e mrekullueshme për Krishtlindje për Ukrainën”, shkroi ai në Twitter.
“Për herë të parë, ne do të marrim automjete të blinduara Bradleys, kjo është pikërisht ajo që nevojitet”, tha ai.
Më 5 janar, presidenti amerikan, Joe Biden, dhe kancelari gjerman, Olaf Scholz, njoftuan se shtetet e tyre do të dërgojnë makina të blinduara, për t’i ndihmuar Ukrainën që të zmbrapsë sulmet ruse.
SHBA do të furnizojnë Ukrainën me makina të blinduara Bradleys. Këto lloje makinash janë të pajisura topa prej 25 milimetrash, mitraloz prej 7.62 milimetrash dhe raketa kundërtank.
Gjermania tha se do të dërgojë në Ukrainë makina të blinduara të llojit Marders.
Zëdhënësi i Qeverisë gjermane, Steffen Hebestreit, tha të premten se rreth 40 Marders do të dërgohen apo makina të mjaftueshme për të pajisur një batalion.
Për një kohë të gjatë, Ukraina ka kërkuar që të pajisjet me armatime të rënda, përfshirë tanke, që do t’i lejonin që të kryente ofensiva. Shtetet perëndimore kanë hezituar që t’i ofrojnë armë të tilla, duke thënë se kanë frikë se një gjë e tillë do të provokonte Rusinë.
Por, ukrainasit kanë ndërtuar momentum dhe qeveritë perëndimore kanë zgjeruar gamën e armëve që po ofrojnë për Ukrainën.
Njoftimet nga Shtetet e Bashkuara dhe Gjermania vijnë një ditë pasi Franca premtoi se do t’i dërgonte Ukrainës tanke të lehta të llojit AMX-10 RC. Këto janë makina që mund të bartin topa më të rëndë.
Po në këtë ditë, presidenti i Rusisë, Vladimir Putin, urdhëroi forcat e armatosura ruse që të zbatojnë një armëpushim përgjatë vijës së kontaktit me trupat ukrainase, më 6 dhe 7 janar, për festën e Krishtlindjes ortodokse.
Por, armëpushimi i shpallur nga Rusia në Ukrainë është thyer pas shkëmbimeve të zjarrit përgjatë vijës së frontit, thanë të shtunën zyrtarët ukrainas. /REL
