Ai e ka bërë këtë deklaratë pas identifikimit të një varreze masive në qytetin e rikthyer të Izjumit.
Ushtria ukrainase ka nisur ditë më parë një kundërofensivë në rajonin verilindor të Harkivit, duke çliruar një mori vendbanimesh.
“Një varrezë masive e njerëzve është gjetur në Izjum, në rajonin e Harkivit”, ka thënë Zelensky në një adresim para publikut.
“Veprimet e nevojshme procedurale tashmë kanë nisur”.
“Buça, Mariupoli, tani fatkeqësisht Izjumi”, ka thënë Zelensky, duke përmendur edhe qytetet tjera ukrainase ku autoritetet kanë thënë se pas zmbrapsjes së trupave ruse kanë gjetur varreza masive dhe të dhëna për krime lufte.
“Rusia është duke lënë gjithandej vdekje mbrapa saj, dhe ajo duhet të mbahet përgjegjëse”, ka thënë ai.
Ministria ukrainase e Mbrojtjes ka thënë se të paktën 440 trupa të vdekur janë gjetur në këtë varrezë masive në Izjum.
“Varreza masive janë duke u zbuluar në Izjum pas çlirimit të qytetit nga (rusët)”, ka thënë ministria përmes një postimi në Twitter.
Forcat ushtarake ruse kanë lënë mbrapa vetes sasi të mëdha të pajisjeve dhe municionit.
