Agjencia Meteorologjike e Japonisë tha se tajfuni Nanmadol po shkonte drejt veriut pasi arriti në tokë në qytetin Kagoshima në ishullin kryesor jugor të Japonisë, Kyushu.
Agjencia e motit parashikoi deri në 50 centimetra (20 inç) reshje deri të hënën në mbrëmje dhe paralajmëroi për përmbytje dhe rrëshqitje dheu.
Në një paralajmërim për banorët agjencia theksoi për nivele “të paprecedentë” të erërave dhe dallgëve të fuqishme, duke i nxitur ata të evakuohen herët.
Paralajmërimet për stuhi dhe valë të larta ishin në fuqi në Kagoshima, ku banorëve iu tha të qëndronin brenda ndërtesave të qëndrueshme në katin e dytë ose më lart, nëse konsiderohet një opsion më i sigurt sesa të shkoni në qendrat e evakuimit, shkruan AP.
Më shumë se 12,000 njerëz u strehuan në qendrat e evakuimit. Në prefekturën fqinje Miyazaki, rreth 8,000 njerëz lanë shtëpitë e tyre.
Zyrtarët lokalë thanë se disa persona ishin plagosur. Në qytetin Kushima në Miyazaki, një grua u lëndua lehtë nga copa xhami kur erërat thyen xhamat e një gjimnazi. Televizioni kombëtar NHK tha se 15 persona ishin plagosur, duke cituar të dhënat e tij./teve1.info/
