Kryetari i Odës Ekonomike të Kosovës, Lulzim Rafuna u është drejtuar me një letër presidentes, Vjosa Osmani, kryeministrit në detyrë, Albin Kurti dhe kryetarit të Bordit të ZRRE-së, Ymer Fejzullahut, me kërkesë që të pezullojnë vendimin e ZRRE-së për daljen e bizneseve në treg të hapur të energjisë.
E, lidhur me këtë kërkesë të tij, në emisionin “Ditari” në Tëvë1, Rafuna ka thënë se sot për sot akti më heroik do të ishte pezullimi i një vendimi që do të dëmtonte biznesin, ekonominë e Kosovës, si dhe qytetarët.
“Ne qëndrojmë pranë kërkesësë sonë dhe edhe tani i jemi drejtuar edhe njëherë institucioneve prej Presidencës, kryeministrit, por edhe Zyrës së Rregullatorit për Energji Elektrike që të pezullohet vendimi. Akti më patriotik sot është pezullimi i një vendimi që mos me dëmtu biznesin, mos me dëmtu ekonominë e vendit dhe në fund qytetarin e Republikës së Kosovës”, është shprehur Rafuna.
Rafuna, po ashtu ka folur edhe për faktin se bizneset ende nuk i kanë marrë faturat për dy muaj sa janë furnizuar nga furnizuesi i fundit KEK-u.
“Jemi në pritje të faturave tani se ende faturat nuk I kemi marrë. Bizneset ende nuk I ka marrë faturat për muajin qershor dhe korrik të cilat kanë qenë të furnizuara me energji elektrike nga Korporata Energjetike e Kosovës. Është shumë e habitshme dhe ne kemi pasur pritje që pas protestës së dytë që e kemi pasur qëllimi ka qenë që t’i presim faturat dhe të shohim me të vërtetë sa po dëmtohet biznesi, cili është rezultati se nuk është qëllimi vetëm me protestu, por qëllimi është që kur proteston ndaj një vendimi edhe ta argumentosh pse nuk po pajtohesh. Pra, qëllimi ka qenë që ne t’i marrim faturat dhe t’ua dëshmojmë sesa ka qenë, sa është dhe sa mund të dëmtohet një biznes ose një industri e tërë. Por këto fatura ende nuk janë lëshuar”, ka theksuar ai.
Ndryshe, bizneset anëtare të Dhomës së Tregtisë dhe Industrisë së Kosovës gjatë ditës së sotme kanë paralajmëruar veprime të ashpra nëse ZRRE-ja nuk tërhiqet nga vendimi për liberalizimin e tregut të energjisë.
