Komisioni Qendror i Zgjedhjeve ka bërë tërheqjen e shortit për renditjen e subjekteve politike të certifikuara në fletëvotimet e Zgjedhjeve Lokale për Kryetarë të Komunave dhe për Kuvende Komunale.
Në bazë të shortit, Lëvizja Vetëvendosje në zgjedhjet lokale të 12 tetorit do të garojë me numrin rendor 105. Ndërsa, Partia Demokratike e Kosovës garon me numrin 191.
Lidhja Demokratike e Kosovës në zgjedhjet komunale të 12 tetorit kandidon me numrin rendor 113. Aleanca për Ardhmërinë e Kosovës në zgjedhjet komunale të 12 tetori kandidon me numrin 174, Ndërsa, Nisma Socialdemokrate me numrin 186.
Në zgjedhjet komunale të 12 tetorit, Alternativa garon me numrin 103, kurse Lista Guxo ka numrin rendor 118.
Lista Serbe në zgjedhjet lokale të 12 tetorit do të garojë me numrin 170.
Ndërkaq, kandidati i pavarur për kryetar të Drenasit, Ramiz Lladrovci, do të garojë me numrin rendor 101.
Rufki Suma kandidat i pavarur për Komunën e Hanit të Elezit në zgjedhjet lokale të 12 tetorit garon me numrin 181.
Kryesuesi i Komisionit Qendror të Zgjedhjeve, Kreshnik Radoniqi tha se tërheqja e shortit është tregues që “kemi hyrë në fazën përfundimtare të procesit zgjedhor”.
Radoniqi tha se procedura për hedhjen e shortit është transparente dhe sipas tij, garanton trajtim të barabartë për të gjitha subjektet politike.
Ndërsa, Aleanca Kosova e Re në zgjedhjet lokale që mbahen në tetor garon me numrin rendor 102.
Kryesuesi i KQZ-së, shtoi se pas hedhjes së shortit do të miratohet edhe dizajni i fletëvotimeve dhe më 17 shtator do të nis votimi jashtë vendi.
“Kjo ngjarje ka simbolikën e vetë, është treguese se kemi hyrë në fazën përfundimtare të procesit zgjedhor të cilin kemi filluar ta përgatisim që nga mesi i muajit qershor. Procedura për tërheqjen e shortit është plotësisht transparente dhe garanton trajtim të barabartë për të gjitha subjektet politike. Zgjedhjet janë themeli i një demokracie, pasi përmes tyre qytetarët shprehin themelin politik duke zgjedhur përfaqësuesit në nivel qendror dhe lokal. Në këtë drejtim KQZ ka detyrë të rëndësisë të veçante të siguroj procese zgjedhore në Kosovë të jenë të lira, të drejta, transparente, të mbështetura në Kushtetutë, ligjin për zgjedhje dhe standardet më të mira ndërkombëtare”, theksoi ai.
Kryesuesi i KQZ-së, Kreshnik Radoniqi po ashtu theksoi se hedhja e shortit sot hap rrugën për të filluar fushatën zgjedhore nga 13 shtatori.
“Aktiviteti i sotëm i hap rrugën 93 subjekteve politike e mijëra kandidatëve të tyre që nga 13 shtatori të fillojnë zyrtarisht fushatën zgjedhore. KQZ fton të gjitha subjektet politike dhe kandidatët të angazhohen për një proces zgjedhor duke respektuar ligjet dhe rregullat zgjedhore në fuqi”, tha ai.
Për Zgjedhjet Komunale të 12 tetorit, janë të certifikuara 93 subjekte politike, prej të cilave 32 parti politike, 2 koalicione, 32 iniciativa qytetare dhe 27 kandidatë të pavarur. Numri i përgjithshëm i kandidatëve që përfaqësojnë këto subjekte politike, është: 5.626 kandidatë, prej të cilëve 206 kandidatë për Kryetarë të Komunave dhe 5 mijë 420 për anëtarë të Kuvendeve Komunale.
Fushata për zgjedhjet e muajit të ardhshëm nis më 13 shtator dhe përfundon para hapjes së qendrave të votimit me datën 12 tetor, në orën 06:59.
