Komisioni Qendror Zgjedhor (KQZ) ka dalë me rezultatet mbi pjesëmarrjen e qytetarëve në zgjedhjet e sotme për kryetarë në 18 komuna të Kosovës, si dhe ecurinë e procesit zgjedhor, raporton KosovaPress.
Në një konferencë për media, kryesuesi i KQZ-së Kreshnik Radoniqi ka thënë se nuk është shënuar ndonjë parregullsi që do të ndikonte në ecurinë procesit zgjedhor.
“Në të gjitha ato raste ku ka paqartësi ose problematika të ndryshme, KQZ-ja është duke i trajtuar në kohë në afatin më të shpejtë të mundur duke i dhënë zgjidhje, duke u mbështetur në të dhënat preliminare që kemi marrë nga rreth 95 për qind të vendvotimeve, numri i qytetarëve me të drejtë vote që kanë votuar deri në ora 15:00 është 273 mijë e 666 votues apo 20.78 për qind. Në raundin e parë në këto 18 komuna kishin votuar 25.33 për qind apo 333 mijë e 489 votues…”, ka thënë ai.
Radoniqi ka sqaruar edhe rreth rastet e ankesave për personat me aftësi të kufizuar gjatë procesit të votimit.
“Në procesin e deritanishëm të votimit kemi pasur disa ankesa për votimin me asistencë për hir të informimit korrekt e shohim të nevojshme që sqarojmë se votimi me asistencë për persona të kufizuar, ata që nuk mund ta mbushin dhe nuk mund ta hedhin fletëvotimin është i garantuar me Ligjin për zgjedhjet me rregullore të KQZ-së. Kjo nuk nënkupton që në emër të kësaj të drejte të garantuar të abuzohet dhe në këtë kategori të tentojnë të hyjnë persona që nuk kanë aftësi të kufizuar. Sipas rregullores së KQZ-së, me qëllim të mënjanimit të keqpërdorimit është përdorur që aftësia e kufizuar e votuesit duhet të dëshmohet përmes dokumentit përkatës”, ka thënë Radoniqi.
Sot në Kosovë qytetarët vendosin për fatin e kryetarëve në 18 komuna, në të cilat nuk pati fitues në raundin e parë më 12 tetor.
