Pesë ditë nga sulmi terrorist ndaj Policisë së Kosovës, krimineli Milan Radoiçiq e pranoi se ishte në krye të grupit.
Bile, në deklaratën e shkruar nga ai e të lexuar nga avokati i tij, Goran Petronijeviq, Radoiçiq, ka marrë përgjegjësinë e plotë për ngjarjet në fshatin Banjskë në veri të Kosovës.
Po tenton ta justifikojë gjithë krimin e mëngjesit të së dielës, ku u vra polici Afrim Bunjaku.
Thotë se qëllimi i tyre ishte rezistenca, e siç thonë ata të terrorit të Albin Kurtit ndaj serbëve të veriut.
“Gjatë përleshjes mes Policisë së Kosovës është vrarë nga gjuajta e eksplozivit dhe jo me plumb. Arsyeja e kthimit tonë ishte inkurajimi i serbëve , popullit të asaj zone, për ti rezistuar terrorit të regjimit të Kurtit. Kosova është pjesë e Serbisë kjo edhe sipas rezolutës 1244, ilegalisht kanë qenë Njësia Speciale e Kosovës. Nëse dikush është ilegal ata kanë qenë Policia e Kosovës dhe jo ne”, tha avokati i Radoiçiqit, Goran Petronijeviq.
I pyetur nga gazetarët si mund të hyhet në një shtet tjetër e të luftohet, avokati u përgjigj me këto fjalë.
“Kosova është pjesë e Serbisë kjo edhe sipas rezolutës 1244, ilegalisht kanë qenë Njësia Speciale e Kosovës. Nëse dikush është ilegal ata kanë qenë Policia e Kosovës dhe jo ne”, tha tutje avokati.
Edhe zgjedhja e personit që do të fliste në emër të terroristit që njihej si bossi i krimit në veri, duket se nuk ishte rastësore.
Goran Petronijeviq njihet si shumë mirë nga shumë persona në Kosovë.
Përgjatë regjimit të ish-liderit serb, Sllobodan Millosheviq, ai ka qenë gjyqtar në Gjykatën e Pejës në Kosovë.
Në atë pozitë, në maj të vitit 2000, ai i ka dënuar 150 shqiptarë të Kosovës me një total prej 1.600 vjetëve burgim nën dyshimet për kryerje të terrorizmit.
Ai është larguar nga pozita e gjyqtarit pas ndryshimeve demokratike të 5 tetorit në Serbi, dhe më pas e ka ushtruar profesionin e avokatit.
Para gjykatës ndërkombëtare, ai i ka përfaqësuar disa klientë nga Serbia, të akuzuar për krime lufte.
Më i famshmi është Radovan Karaxhiq, presidenti i parë i Republikës Sërpska në Bosnje e Hercegovinë, i cili është dënuar me burgim të përjetshëm në Gjykatën e Hagës për krime lufte.
Derisa, Radoiciq, po vazhdon të lihet i lirë në Serbi, ani se nuk është konfirmuar se a është plagosur në sulmin e 24 shtatorit.
Në një deklaratë të premten presidenti serb tha se Radoiciq ka dhënë dorëheqje nga pozita e nënkryetarit të Listës Serbe, që nga shumë kush u pa si veprim për të tentuar që Lista Serbe të mosndëshkohet për krimet e bëra nga nënkryetari i saj.
Kronikë e realizuar nga gazetari, Arton Rama
