Edhe në këtë fushatë zgjedhore, nuk munguan premtimet e partive politike për fushën e shëndetësisë.
Ndër pikat kryesore u përmendën edhe sigurimet shëndetësore.
“Pas hyrjes në fuqi të ligjit të ri për sigurime shëndetësore dhe kompletimit të sistemit informative shëndetësorë hapet rruga drejt funksionalizimit përfundimtar të sigurimeve shëndetësore”, tha kryeministri Albin Kurti.
E nga Partia Demokratike e Kosovës u premtua se qytetarët nuk do ta kenë më barrë pjesën e kostos së shërimit.
“Për pacientët me kancer dhe sëmundje kronike barnat do t’i sigurojmë falas. Edhe në fuqizimin e spitaleve rajonale do të investojmë dhe do të krijojmë sistemin kombëtar të emergjencës”, tha kandidati për kryeministër nga PDK-ja, Bedri Hamza.
Spitalin e ri për të gjithë Kosovën e premtoi kandidati për kryeministër nga radhët e LDK-së.
“Për të gjithë qytetarët tonë që bredhin nëpër shërim nëpër botë, për të gjitha familjet tona këtu në Kosovë do të ndërtojmë spitalin e ri të Kosovës me plotë 500 milion euro investim në të. Spital i ri, lokacion i ri, ndërtesa të reja, pajisje të reja siç e meriton vendi jonë”, tha Abdixhiku.
Por sa u besojnë qytetarët këtyre premtimeve?!
“Ju besojë që i bëjnë edhe ka me u bë mirë me emër të Zotit”, tha qytetari Gani Shabani.
“Besoj që kanë me bë edhe spitale të reja, por normal se duhet pak kohë se ajo nuk rregullohet menjëherë”, tha Synaverej Llapaj.
Por ndryshe mendon qytetari Demë Fetaj.
“Absolutisht nuk e besoj, sepse kanë qenë fjalë që gjithmonë i kanë dhënë, e kur ulën në fotelet e karriget e tyre të buta, ata harrojnë se çka kanë premtuar”, tha qytetari Demë Fetaj.
Sipas njohësit të shëndetësisë, Bujar Vitia premtimet që po bëhen gjatë kësaj fushate zgjedhore, janë të njëjta sikur edhe viteve të kaluara.
“Të gjitha premtimet që bëhen për shëndetësi nuk është se janë gjithmonë të sinqerta, në shumë raste për shkak të ndjeshmëri shfrytëzohen që të krijohen simpati tek votuesit. E ndonjëherë tingëllojnë edhe si premtime të parealizueshme megjithatë ka një laramani të premtimeve nga partitë politike”, tha Vitija.
E si jo të menduara mirë këto premtime po i shohin edhe nga Shoqata e të Drejtave të Pacientëve në Kosovë.
“Ajo çka bie në sy është fakti se në asnjërin nga premtimet nuk preket esenca e reformimit të sistemit shëndetësor, të gjitha kanë qasje të trajtimit të problemeve ‘urgjente’ të sektorit të shëndetësisë. Asnjëra nga to nuk flet qartazi për një kujdes të integruar shëndetësor me pacientin në qendër, gjë e cila i nevojitet më së shumti këtij sektori”, tha Besim Kordra.
Për probleme brenda sistemit shëndetësor janë ankuar shumëherë edhe qytetarët, duke i dhënë theks më së shumti pritjeve për shërbime në klinikat e QKUK-së.
