Autobusi me numrin 22 është linja më e re e trafikut urban.
Qytetarët të cilët dëshirojnë të udhëtojnë nga Prishtina në fshatin Tenezhdoll mund ta shfrytëzojnë këtë linjë që nga data një janar.
E kjo linjë pritet të shkojë në disa fshatra të Podujevës, ku qytetarët mund të paguajnë njëjtë sikurse për biletat të tjera të trafikut urban.
Këtë e kanë pritur mirë qytetarët të cilët udhëtojnë në këto fshatra.
“Kjo është shumë mirë dhe në rregull, qytetarët nuk presin shumë edhe ndoshta trafiku me kerre të vogla zvogëlohet”, Bedri Fetahu – qytetar.
“Po shumë mirë që i kanë lëshu autobusat, çdo minutë po shkojmë, po endem, po dalim”, shpreht Ajshe Bahtiri, qytetare.
“Shumë ka me qenë ndihmesë se maspari autobusi vonohet deri të shkon në Podujevë, bën një orë e tepër”, thotë Kurdi Gashi.
E kundër këtij vendimi të komunës së Prishtinës kanë dalë pronarët e kompanive të autobusëve në Podujevë.
“Si të lëshojnë ata, ne duhet veç me ndal dhe mu dorëzu, se mo nuk mundem me ekzistu si firmë. Se e kanë ata biletën me lirë se ne është 24 orë me 80 centë dhe nuk mundemi me ekzistu më”, thotë Beqir Mustafa, kryetar i shoqatës së autobusëve në Podujevë..
Lëshimin e kësaj linje në disa fshatra të Podujevës, sipas avokatit Ardian Bajraktarit, mund ta shqyrtojë edhe Ministria e Administrimit të Pushtetit Lokal.
“Sa i përket çështjes së transportit, sipas ligjit për vetëqeverisje lokale është kompetencë e komunave marrja e çështjes së transportit me theks të veçantë të licencimit të ofrimit të shërbimeve të transportit vetëm të nivelit lokal që nënkupton brenda për brenda hapësirës komunale por natyrisht është e rëndësishme të theksohet që vendimet e nivelit lokal i nënshtrohen procesit të ligjshmërisë nga niveli qendror përkatësisht të Ministrisë së Pushtetit Lokal”, shprehet Bajraktari.
Nga komuna e Prishtinës kanë njoftuar gjithashtu se qytetarët nga 1 janar kanë sistem të unifikuar të transportit publik urban, me bileta të integruara ditore, javore dhe mujore për të gjitha linjat duke përfshirë edhe ato private.
