Qytetarët me aksione simbolike pas dështimit të seancave
Nuk është deputet i Kuvendit të Kosovës.
Por, para institucionit legjislativ, erdhi pak minuta para se të fillonte seanca plenare.
Kështu, avokati Arianit Koci, të enjten vendosi që dyerve të kuvendit, simbolikisht t’ua vendos drynin.
Krejt kjo më kërkesën që deputetët të gjejnë një zgjidhje për të dal nga ngërçi politik, që çoi në 27 dështime.
“Simbolikisht e mbylla derën e Kuvendit, kam kërkuar nga të gjithë deputetët që i kam takuar sot, të qëndrojnë në ndërtesë derisa ta arrijnë një marrëveshje politike, çfarëdo qoftë ajo, nuk kam asnjë anim politik, thjesht po dua të fillojë dhe të funksionojë Kuvendi”, u shpreh Koci.
Por jo të gjithë të zgjedhurit e popullit, e pritën mirë aksionin e Kocit.
“Nuk mundesh me na mbyllë, s’është punë e jotja”, i tha deputeti i PDK-sw, Rashit Qalaj.
“Është punë e imja me kërku përgjegjësi nga deputetët”, ia kthehu Koci.
Për disa deputetët të tjerë, Koci pati edhe vërejtje.
Ndërkohë në të njëjtën kohë, në hyrjen tjetër të Kuvendit, arriti një student nga Podujeva.
Edhe Menderes Havolli, shfaqi pakënaqësinë e tij, për dështimet e njëpasnjëshme të seancave.
“Nëse kalkulojmë është seanca e 27 duke u mbajtur, shpresojmë që sot do të konstituohet Kuvendi, por që duke marrë parasysh historikun, gjasat janë shumë të vogla, atëherë shuma prej 500 mijë euro sepse paguhen 160 euro mëditje dhe është seanca e 27-të… Natyrisht që është fyese sepse paga mesatare në Kosovë është 350 euro, ndërkaq të hyrat vjetore të cilat një qytetar i sektorit privat apo publik mund t’i ketë janë 4300 deri në 4500”, tha ai.
Për të njëjtën çështje, deputetët e Kuvendit të Kosovës do të kthehen në sallën plenare të shtunën.
