Javëve të fundit, është vënë re rritja e çmimit të naftës në Kosovë.
Kjo po i shqetëson qytetarët pasi siç thonë është rritur edhe çmimi i pothuajse çdo produkti tjetër, përfshirë edhe të artikujve esencial.
“Për ekonominë e Kosovës qysh është me rrogat edhe kjo është shtrenjtë, tash që i kanë shtrenjtu më tepër edhe kjo i rëndon qytetarët”, thotë një qytetar
Kjo ngritje e çmimit të derivateve nuk kaloi pa u vënë re edhe nga mërgimtarët.
“Çmimet ishin rritë shumë. Unë nuk jetoj këtu, jetoj jashtë veç thanë që ka kushtu 1.15 e tash po kushton 1.43, dmth u ngrit”, shprehet mërgimtari.
E për këtë rritje ekonomistët kërkojnë intervenim shtetëror.
“Ngrita e çmimit të naftës në 10 ditët e fundit është ngritë nga bizneset e pandërgjegjshme sepse në vendet e rajonit nuk ka pas rritje të çmimeve të derivateve e në këtë rast duhet shteti që të intervenojë”, thotë ekonomisti Jakup Blleqa.
Çmimin aktual po e arsyetojnë nga Shoqata e Naftëtarëve.
“Për standardin tonë kishte me qenë një euro po këtë nuk e përcakton Shoqata e Naftëtarëve as naftëtarët por e përcakton Berza. Në Berzë ka rritje dhe kjo e reflekton edhe te ne në Kosovë. Mund të them që në Kosovë çmimet janë më të lira në regjion përveç Maqedonisë Veriore e cila e ka akcizën më të lirë”, thotë Fadil Bernjani.
Edhe Aleanca Kosovare e Bizneseve po e arsyeton këtë ngritje, pasi thotë se Kosova nuk ka rezerva të naftës.
“Kosova nuk posedon rezerva, nuk ka rezervuar që posedon rezervat dhe nuk ka rafineri të veten dhe ne varemi në blerje ditore. Dhe kjo është arsyeja pse ne e shtrenjtojmë derivatet menjëherë por nuk i lirojmë menjëherë sepse kemi në rezervuar të pompave, disa ditë shiten”, shprehet Agim Shahini.
Disa javë më parë, çmimi i naftës zbriti në 1.19 cent për litër, ndërsa vitin e kaluar rritja rekord ishte gati 2 euro për litër.
