Nga e enjtja, uji që vjen nga Liqeni i Badovcit u kërkua të mos përdoret për pije dhe gatim.
Kjo për shkak të gjetjes së sasive të larta të manganit.
Megjithatë, nga Kompania Rajonale e Ujësjellësit “Prishtina”, kanë thënë se situata nuk është alarmante, prandaj sipas saj qytetarët nuk kanë nevojë për shqetësim.
Ndërkohë, nga Instituti Kombëtar i Shëndetit Publik kanë njoftuar se në vazhdimësi janë duke u bërë analiza për të parë gjendjen e ujit.
“Laboratorët e Qendrës së ujit në IKSHPK kanë bërë analizat fiziko-kimike të mostrave të ujit nga uji i prodhuar në Fabrikën që furnizohet nga Liqeni akumulues i Badovcit. Bazuar në rezultatet laboratorike del se ka vlera të rritura të Manganit. IKSHPK ka ngritur shkallën e gadishmërisë dhe kontrollit të cilësisë së ujit për pije në zonën e mbulueshmërisë”, thuhet në njoftimin e IKShPK-së.
Në kuadër të kësaj situate, KRU “Prishtina” ka ndërmarrë veprime në lidhje me sigurimin e qasjes së qytetarëve në ujë të pijshëm.
Mirëpo, interesimi i qytetarëve dhe bizneseve nuk ishte i madh. Madje, kishte të tillë, që kishin filluar të blejnë ujë.
Autobotet nuk kishin një vendqëndrim statik, por ndërronin vend herë pas here.
Mospërdorimi për pije dhe gatim i ujit nga Liqeni i Badovcit, përafërsisht pritet të zgjasë 3-4 ditë.
