Autore : Adea Mustafaj
Me pankarta në duar, shumë qytetarë të Vitisë njëzëri kërkuan drejtësi për Auron Ferizin.
I riu humbi jetën pasi u godit nga një veturë më 8 shtator në parkun e qytetit të kësaj komune.
Në protestën e organizuar babai i të ndjerit, Arton Ferizi, tha se për vdekjen e djalit të tij fajtor është edhe ambulanca, e cila sipas tij erdhi me vonesë.
“Djali jem ka ndërruar jetë shkaku i ambulancës e cila është vonuar. Unë e pash edhe dje reagimet e mjekësisë atje që kanë thënë që ambullanca nuk është vanu. Ambullanca është vanu janë kamerat, janë dëshmitë, dëshmitarë të gjallë. Po mas shumti që po më brengos ky fakt pse ambullanta është vanu, me dhonë llogari”, tha ai.
Ndërsa nëna e Auronit paralajmëroi se nëse drejtësia nuk vihet në vend, ata do të veprojnë sipas kanunit.
“Nëse nuk e kap drejtësia, shkojna sipas kanunit tani. Veç drejtësi e du. Nëse nuk ka drejtësi shkojna sipas kanunit…. Djali ka ardh më ka tregu. Unë kur kom shku në Gjilan, menjëherë më thanë ambullanca është vanu, 30 minuta në Prishtinë”, tha Kimete Franku.
Edhe shoku i të ndjerit, thotë që ambulanca është vonuar, teksa kërkon drejtësi për vdekjen e Auronit.
“Ambulanca është vanuar tepër. Do të thotë kur e ka marr Auronin, ka ardh tani mas 30 minuta më ka marr mu. Do të thotë, udhës për në Gjilan unë kam qenë vetë në ambulanc, ju ka prish ambulanca rrugës. Kom prit edhe 30 minuta në udhë qashtu deri sa ka ardhë ambulanca me më marr për së dyti”, tha ai.
Edhe vëllai i Auronit, me lot në sy kërkoi që drejtësia të vihet në vend, derisa ka shprehur dyshime për shoferin e veturës.
“Është shumë e rënd. Jemi duke kërkuar drejtësi, prej policisë, prej ambullandës. Se ai ka qenë njeri që e ka njoftë edhe policia, ai ka pas shumë vepra. Ka shkel edhe njerëz të tjerë. Ka raste që e ka shkel njeri tjetër me motorr. Shumë do raste të tjera që i kanë tregu” , u shpreh Bled Ferizi.
Në protestë morën pjesë edhe përfaqësues të shoqërisë civile në Viti, ku paraqitën tri kërkesat kryesore të tyre.
“Stacioni policor në Viti të jap llogari për papërgjegjësinë e treguar ndaj rastit, marrë parasysh që kanë qenë në dijeni edhe më herët se i dyshuari në fjalë ka qenë i njohur për organet e rendit, përgjegjësi kërkojmë edhe nga gykata këtu në Viti. Po ashtu kërkojmë dorëheqjen e komandantit aktual të stacionit policor në Viti, Afrim Halilit. Kërkojmë llogaridhënie nga institucionet komunale të Vitise, për mosfunksionim të Këshillit Komunal për Siguri në Bashkësi. Si dhe kërkojmë llogari prej tyre që të na tregojnë se përse ky rast nuk është ndërmarr më herët dhe nuk është marr ndonjë hap sa i përket sigurisë së qytetarëve”, tha Florinda Abazi.
Auron Ferizi u aksidentua me 8 shtator në parkun e qytetit, së bashku me katër shokët e tij, nga një veturë e cila dyshohet se kishte devijuar rrugën.
Fillimisht vetura kishte goditur disa karrige në park, dhe më pastaj pesë persona.
Si pasojë e plagëve të marra nga goditjet Auron Ferizi kishte ndërruar jetë.
