Lëvizjet me motorin e tij elektrik i ka thuajse të përditshme në rrugët e Prishtinës.
Kështu thotë se kryen punë më shpejtë, qytetari Fahri Morina.
Megjithatë, ai është optimist se situata me kolonat në kryeqytet do të rregullohet.
“Makinën e kam, por më shumë e përdori motorin. Më shpejtë, më mirë, natyrisht se trafiku shiko si është. Natyrisht se tani masi po punohet duhet me qenë i ngarkuar, se Prishtina është kësisoj. Nuk mundet me ndryshuar askush këtë tash. Natyrisht se nuk është mirë por deri sa të bëhen zgjidhjet e rrugëve, kështu e kemi kjo është gjë normale nuk është veç në Kosovë kjo me kalimin e kohës çdo gjë do të rregullohet”, shprehet Fahri Morina -qytetar
Ndryshe nga Morina, qytetari Albert Maloku preferon që lëvizjet në rrugët e Prishtinës t’i bëjë në këmbë.
“Unë, për vete pretoj me ndezë makinën se vetvetiu po bëhem nervoz e lë më të tjerët. Prishtina është bërë metropol, se të gjithë qytetarët e komunave e fshatrave tjera janë të orientuara në Prishtinë edhe është mbingarkesë. Mirëpo me gjithë atë një pikë faji ju vë edhe profesionalistëve të komunikacionit, se duhet të gjejnë formulën e përbashkët në komunikacion e të mos vije deri të ngarkesat””, shprehet ai.
E qytetari Xhafer Berisha, thotë se kolonat në Prishtinë janë shtuar si pasojë e disa rrugëve në të cilat komuna e ka ndaluar qarkullimin e veturave.
“Kjo krejt është një mungesë e mos koordinimit, mos planifikimit të rregullt, se kjo nuk shkon në planifikuat që cila parti të vjen në pushtet t’i ndryshoj rrugët, t’i mbyll disa t’i hapë disa tjera apo të mundohet të bëjnë një lloj alternative. Mirëpo, kjo alternativë nuk po duket që është e suksesshme qysh duhet të jetë afatgjate, por po bëhet për interesa partiake dhe personale. Kryesisht me ardhjen e këtij kryetarit, ai i ka mbyll disa rrugë, por nuk e di me çfarë qëllimi, por më tepër më duket që e kanë një karakter komercial”, thotë Berisha.
Megjithatë, ndalimi i lëvizjes së veturave në disa rrugë, nuk është shkaku i vetëm i kolonave të krijuara.
Eksperti i komunikacionit, Lavdim Hamiti, thotë se arsyet janë të shumta.
“Arsyet kryesore janë rritja e shpejtë e numrit të automjeteve private, sidomos ato te cilat vijnë nga qytetet tjera, mungesa e infrastrukturës rrugore të përshtatshme dhe planifikimi urban joefikas. Kjo tregon nevojën për një strategji afatgjatë të menaxhimit të trafikut që përfshin përmirësimin e transportit publik dhe riorganizimin e qarkullimit rrugor. Si zgjidhje e shpejte dhe efikase, te riorganizohen rrugët ne një kahore”, shprehet ai.
E ai që fajësohet në vazhdimësi për katrahurën e komunikacionit në kryeqytetit, kryetari Përparim Rama, thotë se kjo luftë është e fituar.
“Kjo është një luftë e paqes për fat të mirë, domethënë e kemi fituar një luftë tash e kemi edhe një luftë të paqës të cilën po e luftojmë së bashku dhe po e fitojmë. Ju lajmëroj më vonë”, ka thënë Rama.
Aktualisht, në Prishtinë janë duke u realizuar punime në disa rrugë kryesore.
