Gjykata Kushtetuese ka marrë vendim për kompensimin e qytetarëve në vlerë prej 40 milionë eurove për rrymën e shpenzuar në veri të vendit. Qytetarët janë shprehur të lumtur me këtë vendim, derisa njohësit e drejtësisë e shohin si sfidues implementimin e këtij vendimi.
Mbi 40 milionë euro do të kompensohen qytetarët për rrymën e paguar në veri të Kosovës pas aktgjykimit të Gjykatës Kushtetuese.
Sipas këtij vendimi, Zyra e Rregullatorit të Energjisë do të detyrohet t’i kompensojë qytetarët që paguan faturat e katër komunave veriore për periudhën prej 6 shkurt 2012 deri më 20 tetor 2017.
Derisa ka filluar të bëhet edhe shpërndarja e faturave në veri të vendit, qytetarët janë shprehur të lumtur që do tu bëhet ky kompensim.
Nga ZRRE kanë thënë se janë duke e analizuar këtë aktgjykim dhe mënyrën e zbatimit të tij.
“Zyra e Rregullatorit për Energji ka pranuar aktgjykimin nga Gjykata Kushtetuese e Republikës së Kosovës, në rastin KI103/23. ZRRE është duke e analizuar këtë aktgjykim dhe do të shqyrtoj të gjitha opsionet e mundshme ligjore që i ka në dispozicion në lidhje me këtë rast.”
Ndërsa për avokatin Arbër Jashari ka qenë i pritur ky vendim por thotë se sfiduese do të jetë mënyra se si do të zbatohet.
Në maj të vitit të kaluar, Zyra e Rregullatorit të Energjisë i ishte drejtuar Gjykatës Kushtetuese me një kërkesë për sqarime se si të veprojë lidhur me aktgjykimin e Gjykatës Supreme, për kompensimin e qytetarëve për faturimin që u është bërë me vite për rrymën e shpenzuar në veri.
Gresa Bardhecaj
