Është i vetmi park publik në komunën e Fushë Kosovës.
Por edhe ky park i Pishave në Sllatinë nuk po i përmbush kërkesat e qytetarëve.
Kjo meqë, në shumicën e herëve që ata vizitojnë këtë hapësirë thonë se hasin në mbeturina.
“Dalim çdo tre ditë këtu pari ecim shëtisim, mirë është ajri është i pastër, por është një mangësi e jona që ne faktikisht nuk e kemi pastërtinë në nivel, hedhin mbeturina e këso gjërash. Kisha pasur dëshirë që populli jonë të vetëdijesohet pak”, shprehet Mustafë Sadiku.
E se ky park nuk mirëmbahet si duhet e thotë edhe ky qytetar.
“Deri diku se po e shohim edhe vet këtu nuk ka pastërti këtu, shikoj shishet këtu, lëngjet i pinë e i hedhin këtu plot”, thotë Murat Murati.
Përveç mbeturinave, qytetarët thonë se në këtë park duhet të rregullohen edhe disa gjëra të tjera.
“Kishte me qenë mundësi edhe më mirë sidomos rregullimi i disa ulëseve, pushimores, lojërave të fëmijëve që janë dëmtuar. Nuk do të thotë që ato që janë rregulluar një herë e nuk duhet të ripërtërihen prapë. Edhe pastërtia po mundohen këta të Komunës me ardhë një herë në javë, por nuk po mjafton pastërtia duhet me qenë pak më shumë në nivel. Mbeturinat me i mbledh ndoshta është nevoja dy herë në javë se jo vetëm një herë në javë se është pak”, tha Mustafë Tremkolli.
Se ky park ka nevojë për kujdes më të shtuar e thotë edhe Vildane Latifi, kryetare e degës së AAK-së në Fushë Kosovë.
“E shoh një neglizhencë të madhe nga Komuna nga qeverisja aktuale. Duke pasur parasysh se është dashur të ruhet kjo pjesë pasi që në qytet nuk kemi hapësirë për ndërtimin e parqeve të reja. Duhet patjetër të ekzistoj një lidhje ndërmjet qytetarit dhe Komunës, kjo mund të bëhet përmes aksioneve të përbashkëta për mirëmbajte dhe duke bërë fushata të vetëdijesimit apo çka do që është e nevojshme për menaxhim të mbeturinave, ku një hapë e një xhiro më bë nëpër “Pisha” mundeni me shikuar sa keq mirëmbahet e vetmja kjo hapësirë publike që e kemi në Komunën tonë”, thotë ajo.
Por, në anën tjetër nga Komuna thonë se mirëmbajtjen e këtij parku e bëjnë rregullisht.
“Mirëmbajtja e pishave bëhet në mënyrë rutinore. Po ashtu rregullimi i dëmtimeve bëhet në vazhdimësi. Edhe pse kemi shpesh dëmtime te pronës publike në parkun e pishave, ne prapë në vazhdimësi i riparojmë. Ndërsa, për mbledhjen e mbeturinave kemi Kompaninë Rajonale të Pastrimit. Në koordinim me KRM “Pastrimi” do të shikohet mundësia për rritjen e kapaciteteve”, shprehet Ardit Sekiraça, drejtor i Shërbimeve Publike.
Mirëmbajtja e hapësirave publike sipas Komunës së Fushë Kosovës po bëhet edhe në lokacione të tjera.
