Qytetarët po ankohen për faturat e larta të ngrohjes për muajin tetor, ani pse thonë që kanë shpenzuar ngrohjen në kohë të pjesshme. Por nga ky institucion nuk e pranojnë një gjë të tillë dhe shpjegojnë se pse mund të ndodhë kjo.
Po kërkon përgjigje për faturën e ngrohjes për muajin tetor.
Konsumatori i ngrohtores Termokos, Sami Mjeku thotë se gjithçka është duke funksionuar si në të kaluarën dhe jo sipas pajisjeve matëse në radiatorë.
E Mjeku këto përgjigje po i kërkon nga zëdhënësja e Termokos-it Afërdita Uka.
“Unë i pyeta këtu më tha vetëm 40 mijë konsumatorë se 17 mijë janë krejt skena arrit na se shumë kemi ngarkesë, kur i pyeta këta nuk ma thanë këtë sikur ju”, ka thënë qytetari, Sami Mjeku.
“Unë i kam shpenzu 100 kilovat por më ka ardhur pa ushall tash cilën me pagu a 100 kilovat a paushallin”.
“Ti e paguan atë që është vlera e caktuar në faturë, ai është obligimi yt”, ka thënë zëdhënësja në Termokos, Afërdita Uka.
Fatura e tij ishte 25 euro e 86 centë për 15 ditët e tetorit.
Ndërsa hallin e njëjtë e ka edhe një qytetarja tjetër, Murteza Shaku.
“Prej vitit të kaluar kanë bërë një testim, kanë vendosur matëset por matëset nuk kanë qenë në funksion vitin e kaluar e si duket nuk janë as këtë vit, është hapësira për të cilën unë e kam njëjtë edhe me kontratë si vitin e kaluar si para 20 viteve, hapësira e njëjtë çmimi është 76 centë”, ka thënë ajo.
Nga Termokos nuk e pranojnë se po ndodh një gjë e tillë duke theksuar se faturat vijnë aq sa shpenzon konsumatori.
“Siç edhe është pritur ka aty këtu ndonjë reagim dhe ankesë nga konsumatorët, të cilat po shqyrtohen me kujdes të shtuar. Ne nuk mund ta pranojmë në asnjë mënyrë këtë formulimin e faturave të fryera. Faturat janë duke shkuar te konsumatori vetëm për aq sa kanë shpenzuar pasi që kemi të bëjmë me një teknologji që është fjala e fundit e teknikës”, ka thënë Uka.
Sipas zëdhënëses, ky është një projekt i ri dhe të papriturat mund të ndodhin.
“Edhe për neve është projekt i ri, ne kemi paralajmëruar se ka shumë të papritura por bashkarisht do të arrijmë ti realizojmë ti zgjedhim të gjitha problemet përndryshe tek ata konsumatorë ku ka pasur shpenzim enorm ne kemi qenë shumë të kujdesshëm nuk kemi lejuar që të ju shkojë një faturë me një çmim enorm për arsye se ata nuk kanë qenë ac të kujdesshëm në zhfrytëzimin racional të ngrohjes dhe nuk i kanë dalur termokokat në radiatorë për atë arsye ata janë faturuar sërish me metodën e vjetër”, ka deklaruar ajo.
Termokosi shpjegon se vendosja e pajisjeve matëse përmes projektit “Prishtina Heat Save” ka për qëllim kursimin e energjisë termike dhe zvogëlimin e shpenzimeve për ngrohje për konsumatorët.
