Në një lidhje telefonike në emisionin “Special” në Tëvë 1, Quni thotë se veteranët po protestojnë me të drejtë në kërkesat e tyre për t’u futur në Ligjin për Pagën Minimale.
“Përkundër asaj që shoqëria civile, veteranët po ashtu deputetët e të gjitha partive përveç LVV e arsyetuan që ky komunitet duhet të mirret në konsideratë por heshtja e mosangazhimi dhe interesimi i autoriteteve të Qeverisë ka sjellë deri te kjo situatë ku tani shohim një pjesëmarrje solide të ish-pjesëtarëve të UÇK-së me kërkesën e tyre të drejtë që edhe ata të trajtohen me masat e parapara nga Qeveria”, shtoi ai.
Tutje, deputeti opozitar thotë se ende nuk është në dijeni se cili është epilogu i takimit të kryeparlamentarit, Glauk Konjufca me shefat e grupeve parlamentare.
“Jam në kontakt me veteranët, në mesin e protestuesve ka edhe bashkëluftëtarë të mi që kemi pasur një të kaluar të përbashkët edhe natyrisht që jemi në bisedime të pandërprera duke u bërë thirrje që të ruajmë qetësinë ashtu siç kanë qenë në luftë. Unë posa dola nga seanca dhe ende nuk e di epilogun e takimit me shefat po sidoqoftë ne do i qëndrojmë afër kërkesave të veteranëve dhe me insistim të madh jemi që vlefshmëria dhe ky komunitet të mirret parasysh”, shtoi ai./teve1.info/
