Deputeti i Lidhjes Demokratike të Kosovës, Anton Quni ka thënë se deklarimi i kryeministrit në detyrë, Albin Kurti se nuk kanë urgjencë për formimin e institucioneve nuk është rezonim i shëndoshë.
Sipas Qunit, qëllimi i Kurtit me anë të kësaj deklarate është të krijojë një perceptim publik se situata nuk kërkon nxitim dhe se partitë politike do të dorëzohen dhe do të pranojnë që thotë Vetëvendosja.
“Në këtë situatë të thuhet që ne nuk kemi një urgjencë për formimin e institucioneve mendoj që nuk është një rezonim i shëndosh. Unë jam më se i bindur që edhe Kurti nuk e mendon ashtu por i duhet në një formë me e arsyetu. Po ashtu mundohet me e kriju një bindje që nëse ne e përceptojmë që me të vërtetë nuk paska urgjencë ne të dorëzohemi do të thotë të pranojmë atë që thotë Vetëvendosja dhe t’i kryejmë veprimet ashtu me kërkesat e Vetëvendosjes pa ndonjë diskutim do të thotë të krijohet përshtypja se ata e kanë tërë kohën e botës në dispozicion dhe nuk kanë asgjë për nguti”, ka thënë ai në emisionin “Info Nata” në Tëvë1.
Mirëpo, Quni ka thënë se Lidhja Demokratike e Kosovës nuk do të zbrapset e as nuk do të dorëzohet para asnjë situate.
“Jo ne nuk do të dorëzohemi dhe as zbrapsemi por ne do të insistojmë se prandaj edhe kemi dalë me oferta si ta kalojmë këtë situatë. Natyrisht aq sa e kemi ne forcën dhe mundësinë me ndiku e me i determinu veprimet proceset por që do të dorëzohemi askush mos ta mendojë që Lidhja Demokratike e Kosovës dorëzohet para ndonjë situate”, ka shtuar Quni.
Tutje, ai është shprehur se Lëvizja Vetëvendosje gjatë mandatit të saj katërvjeçar ka krijuar një ndarje të skajshme e cila nuk do të duhej të ndodhte.
“Për një mandat të qeverisë së Vetëvendosje është krijuar një polarizim i skajshëm i partive politike e i shoqërisë që nuk do të duhej të ndodhte, nuk kishim nevojë për këtë polarizim Polarizimi ka shkuar aq larg sa që është tentuar që para qytetarëve një parti sic është Vetëvendosje qenka gardiane e vlerave nacionale kombëtare shtetërore dhe gjithë të tjerat janë në axhendën e hartuar diku në Beograd”, ka përfunduar Quni./teve1.info/
