Shtetet e Quint-it, Mbretëria e Bashkuar dhe Shtetet e Bashkuara të Amerikës si dhe Zyra e BE-së në Prishtinë përmes një deklarate të përbashkët kanë shprehur shqetësimin e tyre lidhur me ndalimin e hyrjes së Patriarkut të Kishës Ortodokse Serbe në Kosovë.
Ata thonë se një veprim i tillë nga ana e institucioneve të Kosovës, është në kundërshtim me dispozitat e Planit të Ahtisaarit, i cili përcakton qartë të drejtat, privilegjet dhe imunitetet për klerin e Kishës Ortodokse Serbe.
“Ambasadat e Francës, Gjermanisë, Italisë, Mbretërisë së Bashkuar dhe Shteteve të Bashkuara dhe Zyra e Bashkimit Evropian në Kosovë janë të shqetësuara me vendimin e Qeverisë së Kosovës për të mos lejuar hyrjen në Kosovë Patriarkun Porfirije të Kishës Ortodokse Serbe dhe peshkopët e tij shoqërues për të marrë pjesë në fillimin ceremonial të Kuvendit të rregullt vjetor të Sinodit në Patriarkanën e Pejës. Vendimi i Qeverisë është në kundërshtim me dispozitat e Planit të Ahtisaarit, i cili përcakton qartë të drejtat, privilegjet dhe imunitetet për klerin e Kishës Ortodokse Serbe dhe nuk është në përputhje me obligimet e Kosovës në Dialogun e BE-së”, thuhet në reagimin e tyre në Facebook.
Ndërsa nga Ministria e Punëve të Jashtme dhe Diasporës e Kosovës kanë thënë se kështu do të ndodhë deri atëherë kur Serbia më nuk shkel marrëveshjen e Brukselit, e cila mes tjerash parasheh lejimin e vizitave të ndërsjella.
“Përderisa Serbia vazhdon të shkelë marrëveshjen e Brukselit, të mos lejojë vizitat e zyrtarëve tanë shtetërorë në Serbi dhe për më tepër të mos ndalet me fushata kundër Republikës së Kosovës në arenën ndërkombëtare, si në proceset integruese ashtu edhe ato të njohjes, të vazhdojë të përdorë gjuhë të urrejtjes dhe kërcënime kundër Republikës së Kosovës dhe përfaqësuesve të saj, nuk do të lejohen vizitat as nga ana jonë” thanë nga MPJD. /teve1.info/
