Gjykata Kushtetuese në pjesën kryesor të aktgjykimit për seancën konstituive ndër urdhërat që ka dhënë, ka qenë edhe ai që të gjithë deputetët duhet të marrin pjesë në votimin për kryeparlamentarin.
Duke folur për këtë urdhër dhe mospjesëmarrjen në votim nga deputetët e partive opozitare të legjislaturës së kaluar, zëvendësministri në detyrë i Drejtësisë, Vigan Qorrolli ka thënë se ata duhet t’i kërkojnë falje kryesuesit të seancës, Avni Dehari.
Ai në emisionin “InfoNata”në Tëvë1 ka thënë se kjo është një kërkesë e tij morale.
“Tash nuk mund tw liroheni në asnjë mënyrë nga mospjesëmarrja në votim. Kjo ishte një kërkesë e imja morale për kërkim falje që deputetët që s’kanë marrë pjesë në votim, sespe gjykata tash nuk ka thënë obligohen, ka urdhëruar me fuqinë që ia jep Kushtetuta…”, ka thënë Qorrolli gjatë një diskutimi me deputeten e AAK-së, Time Kadrijaj.
Por, deputetja e AAK-së ka thënë se kryesuesi i seancës duhet së pari t’i kërkojë falje popullit për shkelje të Kushtetutës për disa muaj.
Ajo në “InfoNata” ka thënë se ata kanë marrë pjesë në votimin e hapur për kryeparlamentarin, por ka thënë se propozimi i Deharit për votim të fshehtë ka qenë antikushtetues.
“Z.Dehari pa konsultime ose pa një mocion procedural e ka kaluar votimin e hapur në të fshtehtë, në fakt tentimin për të kaluar në të fshehtë, ne e kemi cilësuar si antikushtetuese. Nuk kemi cfarë t’i kërkojmë falje z.Deharit, në fakt ai është personi që duhet t’i kërkojë falje publikut, sepse më shumë se një muaj e ka shkel kushtetutën. Tash të gjitha janë të qarta, deputetët duhet të votojnë, dhe të kemi votim të hapur dhe ne këtë e kemi kërkuar”, ka thënë ajo.
